Македонија во дефлација - во ноември 2,3 отсто

Неколку месеци земјава никако да излезе од зоната на дефлација. Македонија во ноември годинава имала стапка на дефлација од 2,3 отсто, за колку што се намалиле трошоците за животот на годишно ниво.

Според податоците на Државниот завод за статистика, трошоците за животот во ноември годинава во однос на претходниот месец, пак, бележат зголемување од 0,3 проценти.

Државните статистичари вчера соопштија дека цените на мало во ноември на годишно ниво се намалени за 2,1 процент, додека во однос на октомври годинава се зголемени за 0,2 отсто.

Зголемувањето на трошоците за живот во ноември годинава, во однос на октомври, е резултат на повисоките цени на зеленчукот, рибата, свежото и киселото млеко, преработките од риба, мастите, како и кондиторските производи. Пораст на цените е забележан и кај нафтените деривати, обувките, предметите за домаќинство, облеката, козметичките производи и здравствените услуги.

Намалување на трошоците за животот во истиот период е забележано кај овошјето, производите од жито и јајцата, кај безалкохолните пијалаци, како и кај услугите за образование, храна и пијалаци во хотелите и во рестораните, средствата за образование, услугите за сместување, административните услуги.

Вредноста на потрошувачката кошница за исхрана и пијалаци за едно четиричлено домаќинство за ноември 2009 година, пресметана врз основа на цените на мало, изнесува 11.737 денари и во однос на претходниот месец е повисока за еден процент. (Ек.Р.)