Нема пролонгирање на рокот за дивоградбите
Како што наближува крајниот термин за легализација на дивоградбите - 3 септември, дел од граѓаните веќе бараат да се продолжи овој рок. Но, локалните власти се децидни дека нема да има пролонгирање.
„Нема да има продолжување на рокот за легализација на дивоградбите“, изјави во саботата градоначалникот на Скопје и претседател на ЗЕЛС, Коце Трајановски, при што апелираше граѓаните да ги искористат преостанатите денови до истекот на рокот и да поднесат документи. Тој најави дека општините ќе работат прекувремено, но и во текот на викендите. „За продолжување на рокот не размислуваме, поради тоа што ако тој се продолжува, нема никаде да стасаме. Законот даде доволна можност и доволно време. Покрај тоа, ЗЕЛС вчера објави повик до сите граѓани да дојдат во својата општина и да поднесат само барање за легализирање на нелегална градба. Потоа можат во текот на шест години да ја комплетираат документацијата и да добијат имотен лист“, истакна Трајановски.
Од 300.000 дивоградби во сите општини во земјава, досега се поднесени околу 170.000 барања за легализација, од кои поголем дел во изминатите неколку дена. (Ек.Р.) |
