Татко и син се борат за живот, напаѓачот во бегство
Благоја и Александар Јовановски беа ранети по бизарна расправија во Ченто во Скопје
Таткото и синот кои завчеравечер беа ранети во оружен инцидент во скопската населба Ченто се борат за живот во скопските болници. Нивната здравствена состојба е сериозна, информираат од Клиничкиот центар и во Градската болница каде што се хоспитализирани. Полицијата се' уште трага по Муртезан Кадриев (58), кој пукаше во Благоја (48) и во 18-годишниот Александар Јовановски, револтиран што таткото и синот претходно ги искарале неговите деца.
Инцидентот се случи во четвртокот околу 18 часот пред продавницата „Баже комерц“, сопственост на семејството Јовановски, што се наоѓа на улицата „Алија Авдовиќ“ во близина на ОУ „25 Мај“ во населбата Ченто. Според информациите од МВР, инцидентот се случил откако група деца фрлале камења кај продавницата „Баже комерц“, по што Благоја ги предупредил да не прават бели, а тие отишле дома и им се пожалиле на родителите. Муртезан Кадриев дошол да ги расчисти сметките, но по кратка расправија, извадил пиштол и со него стрелал во продавницата, погодувајќи го Александар. Таткото и синот се обиделе да го спречат напаѓачот, но тој испукал уште два куршума и побегнал. Александар со тешки повреди итно бил префрлен во Клиничкиот центар.
„Пациентот има прострелна рана во пределот на градниот кош, скршеница на градниот прешлен и крвавење во градната шуплина. По извршената операција, пациентот е префрлен на Клиниката за реанимација и интензивно лекување“, велат од Клиничкиот центар.
Таткото на Александар е сместен во Одделението за интензивна нега и реанимација во Градската болница. „Неговата здравствена состојба е критична“, информираат од болницата. При увидот, полицијата пронајде три чаури. Бил извршен и претрес во куќата на Муртезан Кадриев, но не бил пронајден ниту пиштолот, со кој пукал. По него се трага. (Г.А.) |
