Насловна

Судот ја одби жалбата на Љубе Бошкоски за укинување на притворот

Обединети за Македонија за в недела најави протест пред Министерството за правда

Кривичниот совет на скопскиот Кривичен суд ја отфрли жалбата што ја поднесе лидерот на Обединети за Македонија, Љубе Бошкоски, преку својот бранител. Жалбата, која се однесува на изречениот притвор, е отфрлена ��оради опасност осомничениот да го повтори кривичното дело или да побегне.

Од таборот на Бошкоски посочуваат дека двете точки поради што се продолжува притворот се неосновани, бидејќи двете патни исправи на осомничениот му се понудени на судот, а со оглед на тоа што изборната кампања е завршена, невозможно е дојде до повторување на кривичното дело.

Од партијата Обединети за Македонија, чиј лидер е токму Љубе Бошкоски, сметаат дека апсењето што се случи само еден ден по одржувањето на парламентарните избори, е класичен политички монтиран процес и дека се користат сите механизми тој да биде замолчен.

„Имаме информации дека припадниците на полицијата што го реализираа монтираното апсење се експресно наградени“, изјави Наталија Ивчева, членка на Претседателството на ОМ и за в недела во 17 часот најави протест на членовите и на поддржувачите на партијата пред Министерството за правда, а протестот ќе заврши пред комплексот судови. Оттаму и најава дека тие ќе го поднесат извештајот за финансирање на кампањата без потпис на претседателот, бидејќи немаат никаков контакт со лидерот Бошкоски.

За обвинувањата што ги упати ОМ на сметка на МВР уследи реакција од полицијата, која смета дека оваа партија „исто како и во текот на целата изборна кампања, продолжува со изнесување лаги и манипулации, иако за таквиот однос биле казнети на изборите“. Во своето писмено соопштение МВР негира дека нивни вработени што учествувале во реализацијата на акцијата наречена „Кампања“ биле наградени за нивните заслуги.

На целиот галиматијас што го следи овој случај од завчера се надоврза и изјавата на сопругата на притворениот Љубе, Виолета Бошкоска, која на јавна трибина каже дека само еден час пред апсењето на лидерот на ОМ, нивниот син добил сериозна закана од некој од шефовите на обезбедувањето на висок државен функционер.

Љубе Бошкоски беше уапсен од полицијата во минатиот понеделник на паркингот пред скопскиот ресторан „Воденица“ при обид да прими 100.000 евра. Тој беше приведен, а потоа и осомничен дека сторил две кривични дела: незаконско финансирање на предизборната кампања и злоупотреба на службената должност. Кратко време по неговото приведување, од МВР беше соопштено дека Бошкоски со примена на таканаречени посебни истражни мерки, бил следен цели два месеца и дека во април и во мај примил пари што ги употребил во изборната кампања. (Љ.С.)