Загина 19-годишен градежен работник
На градилиште на улицата „Салвадор Аљенде“ во близина на некогашниот скопски хотел „Панорама“ загина градежен работник.
Причина за загинувањето на 19-годишниот Сали Х. од скопското село Стајковци е одрон на земјиште што целосно го затрупал.
Работниците што се нашле на местото на настанот во тоа време успеале да го откопаат својот колега, а потоа била повикана и екипа на Брза помош, но таа само ја констатирала неговата смрт.
Според официјални извори на местото каде што градежни работи изведувала градежната фирма „Грамонт“ од Радовиш, работеле Сали Х. и уште едно лице од селото Синѓелиќ. Имено, тие двајцата работеле на рамнење на претходно ископаниот канал, но во исто време во непосредна близина со работна машина лицето Р.С. (48) од Крива Паланка вршело ископ на земјиште за водоводна инсталација. Во еден момент дошло до одрон на земјиште, при што земјата го затрупала младиот Сали.
За трагичниот настан биле известени истражен судија и јавен обвинител, а телото на починатиот е дадено за обдукција. (Љ.С.) |
