Римеч Изнер - Мау на Вимблдон
Актерите на ланскиот најдолг тениски меч во историјата ќе се сретнат на стартот и в понеделник
Џон Изнер и Никола Мау, чија битка во првото коло на Вимблдон минатата година траеше дури 11 часа, годинава повторно ќе се соочат еден со друг откако вчерашната ждрепка им овозможи римеч. Двајцата, чиј што меч лани на теренот 18 во клубот „Ол Ингланд“ се развлече три де��а пред Изнер да го добие последниот сет со неверојатни 70-68, одново ќе се сретнат в понеделник на стартот од Гренд-слем турнирот што почнува в недела.
Најдолгиот тениски меч во историјата го вчудовиде спортскиот свет, оставајќи ги играчите физички целосно исцрпени, а Мау се бореше и со депресија цели три месеца потоа. Пред ждрепката тој го преколнуваше организаторот да не го испраќа на теренот број 18, но не можеше ни да замисли дека судбината може да си поигра со него во уште поизразена форма. Французинот во почетокот на јуни изјави дека чувствува „огромна тага што го изгубил мечот за кој никогаш нема да добие шанса да го одигра повторно“.
Светскиот рекет број еден Рафаел Надал ќе ја почне одбраната на титулата против Американецот Мајкл Расел. Шпанецот е сместен во спротивната половина од скелетот на турнирот од шесткратниот освојувач на Вимблдон, Роже Федерер. Швајцарецот овој пат како трет носител ќе стартува против Михаел Кукушкин од Казахстан, а вториот носител Новак Ѓоковиќ ќе игра со Французинот Жереми Шарди.
Домашниот миленик Енди Мари, четврти носител кој се загреа за Вимблдон со триумф на турнирот на трева во клубот „Квинс“, на стартот ќе се сретне со Даниел Химено-Травер од Шпанија. |
