Стив Џобс, Хасан Приштина и Фаик Абди ќе стасаат на скопските улици

Предлозите на ВМРО-ДПМНЕ и ДУИ, очекувано, го минаа првиот филтер во постапката за преименување на улиците

Деспина Трајковска


Голи Оток, Зоран Ѓинѓиќ, Калеш Анѓа, Лучијано Павароти, Стив Џобс, Фаик Абди, Мајка Тереза, Кралица Теута, Скадар, Тирана, Хасан Приштина, Клубот „Башкими“, Дервиш Хана, Мустафа Кемал Ататурк, Јахја Кемал, Јигит-паша... Ова се само дел од над 300 предлог-имиња кои е извесно дека до есенва ќе се искористат за преименување на дел од постојните скопски улици, мостови, булевари...

Комисијата за именување во Град Скопје, која е првиот филтер за преименување на улиците, по тричасовна седница даде позитивно мислење за сите предлози на ВМРО-ДПМНЕ и на ДУИ, но и на Демократската партија на Турците, за, како што коментираат некои, мир во куќата на владејачката коалиција. Поддршка не доби речиси ниеден предлог на ВМРО-НП и на ДПА, а советничката група на СДСМ, пак, воопшто не достави предлози со образложение дека нема потреба од менување на имињата на улиците. Седницата, која се одржа завчера попладне, поминала во нормална атмосфера, на моменти со саркастични коментари од присутните, но без големи дискусии и политички препукувања. Очекувано, како што коментираат од ВМРО-НП и СДСМ, поминале предлозите на коалициските партии, што, всушност, велат, е договор постигнат во врвот на политичките партии.

„Апсолутно се' беше режирано и договорено уште пред седницата. Бидејќи предлозите уште претходно ги усогласиле, седницата беше чиста формалност. Очигледно беше дека некои предлози од опозициските партии воопшто не ги ни разгледале“, разочарано коментира Слободан Близнаковски од ВМРО-НП, кој присуствувал на комисијата.

Тој смета дека навистина е срамно да се прифатат предлози за имиња на улици по личности кои немаат никаква допирна точка со државава. Такви, вели, се 99 отсто од прифатените предлози на ДУИ.

„Ниту поранешниот потпретседател на ВМРО-ДПМНЕ, Доста Димовска, ниту бранителите не добија согласност како предлог доставен од мојата партија. Како може, на пример, еден Лучијано Павароти да добие улица, иако е неоспорен како уметник, а да се заборави заслугата и делото на бранителите за нашата држава“, се прашува Близнаковски.

Тој вели дека сите свои забелешки ќе ги каже на седницата на Советот на Град Скопје, кога предлозите ќе стасаат на конечно усвојување. Ќе се обиде со амандмани, како што вели, да исправи дел од пропустите на комисијата.

„Се прашувам како можеа да го одбијат предлог-името ’Бугарија‘, првата држава која не' призна под уставното име. Во случајов, наместо да создаваме вистински пријателски соседни односи, ние го поткопуваме пријателството“, додава Близнаковски.

И од СДСМ, генерално, имаат слично видување на целиот случај. Советникот Петар Арсовски вели дека Комисијата практично го одобрила очигледниот премолчен договор меѓу коалициските партнери во власта, кои имаат и мнозинство во самата комисијата и во Советот на Град Скопје. Тоа било една од причините зошто од СДСМ не доставиле предлог-имиња, а истовремено сметаат и дека нема потреба од нови имиња на улиците.

„Згора на се', сметаме дека за ова треба да се изјаснат граѓаните на референдум. Недозволиво е како во случајов да се наметнуваат имиња на улици по политичко или идеолошко мислење“, вели Арсовски.

Имињата ќе ги сменат најдоцна налето

Конечната промена на имињата на улиците на терен се очекува да се случи најдоцна до летово. Освен што постапката за минување на предлозите ги поминува сите филтри, Град Скопје е во потрага по фирма која изработува табли со имиња на улици.

Инаку, процедурата налага Комисијата од Град Скопје да ги достави одобрените предлози до општините на мислење, кое не е обврзувачко при конечната одлука. Оттаму до Владата, која треба да даде согласност и, на крај, да дојде пред градските советници за конечна одлука. Упатените велат дека целата процедура ќе се одвива со најкуси можни рокови, за предлозите конечно да се усвојат најдоцна за два-три месеци, за да не се навлезе во шестмесечниот период пред претстојните локални избори, кога е недозволено да се носат вакви одлуки.

Дури потоа ќе се одлучува која улица ќе добие некое од новите имиња и ќе се знае колку, всушност, улици имаат потреба од преименување. (Дс.Т.)

ВМРО-ДПМНЕ со над 260 предлози, ДУИ со 43

Првиот филтер го поминаа над триста предлози, најголем дел од нив доставени од владејачката партија. Албанскиот коалициски партнер доставил 43 предлози, а ДПТМ осум. Сите тие се прифатени. Стотина предлози, пак, од ДПА и ВМРО-НП не добиле позитивно мислење. Меѓу нив се Охридско востание, имињата на бранителите, на Доста Димовска, Д��митар Ѓузелов, Маригона, Јаков Соса, Енвер Идризи, Мула Хаџи Зека.... (Дс.Т.)