И без НАТО му е удобно во Владата

Лидерот на ДУИ, Али Ахмети, навреме ги расчисти сите комбинаторики за можно рекомпонирање на власта

Два месеци пред самитот во Чикаго, лидерот на ДУИ, Али Ахмети, побрза да ја подготви јавноста да не очекува потреси во Владата поради новата пропуштена можност за влез на Македонија во НАТО.

Откако претставници на меѓународната заедница јасно кажаа дека, без решение за името, шансите за зачленување во алијансата се рамни на нула, Ахмети деновиве се изјасни дека не верува оти исходот од престојниот самит ќе предизвика политичка криза во земјава. ДУИ, рече тој, нема да ја напуши владејачката коалиција, бидејќи е сериозна партија која не дејствува во еуфорија, туку ги разбира реалните околности.

„Работиме секојдневно за зачленување на државата во НАТО и во ЕУ. Работевме вчера, работиме денеска, ќе работиме и утре и нема да се повлечеме од тој голем проект во интерес на стабилноста на државата,“ рече Ахмети, расчистувајќи ги дилемите, што подолго време се присутни во политичките кругови, за можно рекомпонирање на власта, по Чикаго. Тој уште кажа и дека интегрирањето на Македонија е обврска и одговорност на секоја политичка партија, независно дали е на власт или во опозиција.

Истата вечер кога Ахмети ја даде изјавата се случија инцидентите во градски автобуси во Скопје. Овие настани се ставаат во контекст на меѓуетничките односи, што беа ставени на тест за време на искричењата меѓу Струга и Вевчани, каде што градоначалниците се од ДУИ и од ВМРО-ДПМНЕ, за дополнително да зовријат по убиството во Гостивар.

Две компоненти ја издигнаа ДУИ во централна точка околу која се вртат сите комбинаторики за евентуална промени во политичката констелација: Распоредот на силите во парламентот по последните избори ја става ВМРО-ДПМНЕ во понеудобна ситуација, во споредба со позицијата што ја имаше до лани. Кога ДУИ би излегла сега од коалицијата, ВМРО-ДПМНЕ би останала без мнозинство во законодавниот дом. Втора работа се постојаните инсистирања на интегративците за забрзување на евроатланското интегрирање на Македонија, како предуслов за стабилност на земјата и на регионот во целина.

„Проблемот со имет�� треба да се реши до Самитот во Чикаго, бидејќи секое одлагање на зачленувањето на Македонија во НАТО ги поттикнува деструктивните елементи во земјава и во регионот да произведат нестабилност, како што и растечкиот евроатлантски скептицизам предизвикува нетолерантност меѓу заедниците“, изјави Ахмети во ноември минатата година, по една од средбите со американскиот амбасадор Пол Волерс.

ДУИ издејствува да ги добие челните места во владините ресори за европски прашања и за одбрана, но ни нејзините кадри, очигледно, не можат да ги поттурнат закочените интеграциските процеси. Опозицијата, пак, постојано ја потсетува владејачката партија од албанскиот блок дека не може да се исклучи од одговорноста за загрозените евроатлантските перспективи на Македонија.

Но ни опозиционерите веќе не веруваат дека ДУИ е подготвена да ги напушти удобните позиции во Владата, во име на основните приоритети во платформата на партија. Лидерот на ДПА, Мендух Тачи, изјави деновиве дека нема илузии дека, по Чикаго, Ахмети ќе повлече чекор со кој ќе предизвика паѓање на Владата. „Убеден сум дека ДУИ нема со ништо да придонесе за скорешно евроатланско интегрирање на Македонија“, изјави Тачи.

Многу настани по последните парламентарни избори упатуваа на тоа дека ВМРО-ДПМНЕ и ДУИ се' подобро се разбираат, и покрај впечатокот дека меѓу нив има судири. Затворањето на хашките случаи и усвојувањето на новите закони за употреба на знамето и јазикот на заедниците го сигнализираа тоа уште пред формирањето на нивниот втор владин кабинет. Впечатокот дека „соживотот“ на „Илинденска“ добро функционира, деновиве, се надополнува со листата за одбележување годишнини на значајни настани и личности, во која влегоа многу датуми од историјата на Албанците, како и со преименувањето на училиштата во Чаир, составувањето на списокот со нови имиња за скопските улици...

Познавачи на приликите во ДУИ сметаат дека за оваа партија се многу важни локалните избори во 2013, откако во 2009 и' ослабнаа позициите во неколку општини, а ги изгуби и градоначалничките места во Тетово и во Гостивар. За ДУИ е важно да учествува на изборите од позиција на власт и при тоа да има монопол во албанскиот политички блок. На Ахмети, велат наши соговорници, не му одговара да ја дели власта со Мендух Тачи и со Руфи Османи и затоа упорно со држи до принципот дека владата треба да ја составуваат победничките партии во двата политички блока.