Поглед

Премиере, врати се!

Димитар Чулев

Многу смешно настапи лидерот на една вонпарламентарна партија кој го повика Никола Груевски да се врати во земјата и да ги смири тепачките во автобусите.

Поразително е сознанието дека во некои кругови премиерот се доживува како директен чувар на мирот и поредокот и дека во негово отсуство престанува функционирањето на институциите на државата што доведува до помалку или повеќе комичните повици во стилот „Грујо врати се - се' ти е простено“.

Тепачките во автобусите на едни и исти скопски линии се случуваат со години, но овој пат пресметките на разулавените хулигани се креваат на ниво на предвесник на некаква меѓуетничка „војна“ која следува или која никогаш и не е завршена.

Апелите, па и од надворешни посматрачи, инцидентите да се посматраат на ниво што се - значи како сериозно кршење на јавниот ред и мир и загрозување на безбедност на граѓаните - се пренебрегнуваат и упорно во тепачките во „68-ка“ во „65-ка“ или на автобуска станица пред „Чаирчанка“ се бара скриена заднина: заговор или почеток на некаква „арапска пролет“ во Македонија. Или, едноставно „дефокусирање на вниманието од...“ што би рекле експерти.

Но, факт е. Груевски на враќање од Индија и Малезија ќе наиде на многу поинаква атмосфера од таа пред тргнувањето во уште еден обид за промовирање на Македонија како земја во која може и треба да дојде странски капитал и светски брендови.

Дома очигледно работите не се ни оддалеку розови. Почна кампањата за локалните избори, почнаа шпекулациите за „преиспитување“ на односите во владината коалиција, во ек се црните прогнози за Македонија по Чикаго 2012.