(ФОТО) Паркот спроти „Бристол“ замина во историјата



Освен зграда за седум владини институции на просторот има маркица и за нов објект на ЕЛЕМ

ФОТО: Петр Стојановски

Деценискиот парк спроти хотелот „Бристол“ од денеска е претворен во уништен простор. Рачно и машински десетина работници од изутрината почнаа со масовната сеча на дрвјата. Иако никој од надлежните не информираше зошто се уништува паркот, извесно е дека тој за некој ден целосно ќе замине во минатото, бидејќи теренот треба да се подготви за градилиште. На тоа место има две маркици за изградба на десеткатници. Едната е наменета за ��бјект во кој ќе се сместат седум владини институции, а другата за нов административен објект на ЕЛЕМ.

Која од зградите ќе почне да се гради, вчера не успеавме да добиеме одговор. До неодамна Владината служба за општи и заеднички работи беше во потрага по фирма која ќе го изгради објектот за административците, додека ЕЛЕМ, пак, го избра идејното решение за изгледот за зградата, но, досега не сакаше да го презентира во јавноста. Единствено се знае дека објектот ќе биде во стилот на класицизмот, а налик на градбите од „Скопје 2014“ ќе биде и објектот на администрацијата.

Инаку, во случајот со административниот објект, владината служба е задолжена да ги заврши сите процедури околу избор на фасадата, изработка на проектот, избор на изведувач, обезбедување градежна дозвола, додека изградбата ќе ја финансираат институциите што ќе се сместат во објектот. Во него простор ќе има за Централен регистар, за Комисијата за хартии од вредност, за Агенцијата за супервизија, за Регулаторна комисија, М-НАВ, а дел ќе биде резервиран и за АД за станбен и деловен простор и за Фондот за осигурување на депозити. (Дс.Т.)