12.10.2012, 11:42 Момент за вистината за фудбалерите
Вечерва нашата фудбалска репрезентација домаќин на хрватската во квалификациите за СП 2014
САШКО Ѓ. ДИМОВСКИ
Македонската фудбалска репрезентација се наоѓа пред нови два испита на зрелоста. Вечерва на Националната арена „Филип Втори“ (20,30 часот), во октомвриската сесија во квалификациите за СП 2014 во Бразил, ќе го полага првиот со Хрватска, во вторник на истиот мегдан своето знаење ќе го демонстрира и против Србија пред многубројната комисија на трибините. Добра партија и максимално залагање на тревникот е обврска на секој еден во составот на Чедомир Јаневски за потврда дека игрите во Загреб и во Глазгов во минатиот месец не беа случајност и дека нешто навистина се движи во позитивна насока кога е во прашање нашиот национален тим. Велиме обврска која, сепак, не треба да ги обремени играчите, а и публиката во текот на целиот натпревар коректно да се однесува кон своите репрезентативци и да ги бодри и поддржува и кога не оди наместо да негодува и исвиркува. Тоа секогаш и во секоја прилика може да биде контрапродуктивно што во најчест број случаи во пракса и се потврдува. Токму на тоа укажува и Јаневски. Дека се чувствува позитивната атмосфера околу националниот тим признава и дефанзивецот на Стеауа, Даниел Георгиевски кој упати апел до навивачите да бидат 12 играч на репрезентација вечерва.
„На секој чекор ја чувствуваме позитивна атмосфера и енергија. Сознанието дека народот е зад нас и со нас е прекрасно. Одамна не било вака кога е во прашање репрезентацијата. Се надевам дека трибините ќе бидат полни и публиката ќе биде наш 12 играч против Хрватска за чии квалитети нема потреба да се трошат зборови. Нивната позиција на ранг листата на ФИФА и играчкиот кадар што го поседуваат доволно кажува. Ќе дадеме се што е во наша можност во напорите и желбите за позитивен резултат. Имаме континуитет на добри игри во последните неколку мечеви, се надевам дека ќе биде така и во натпреварот. Мотиви не ни недостасуваат“. вели Даниел Георгиевски кој важи за одличен познавач во хрватските фудбалски прилики со оглед дека изминатите шест сезони во кариерата ги мина во Динамо Загреб, Меџимурје и Шибеник од каде се пресели во Букурешт.
Националниот тим доби позитивна оценка за начинот со кој влезе во мундијалската кампања кон Јужна Америка. Беше рамноправен партнер на Хрватите на "Максимир", беше подобар од Шкотланѓаните на „Хемпден парк“, но за жал, остана со само еден бод од воведните две гостувања. Затоа и задоволството од играта е големо, од резултатот не. Свесен е за тоа и Јаневски кој во единствената прес конференција пред средбата порача дека би бил среќен и послаби игри само да се освојуваат бодови.
Македонија влегува во два меча во кои улогата на фаворит ја понесува ривалот. Таквиот момент, меѓутоа, е спореден во целата ситуација и не смее да се дозволи да ја наруши стабилноста на нашите репрезентативци кои треба да ја сочуваат смиреноста, да се концентрираат во натпреварот и да се фокусираат на она што треба да го одработат на зелениот правоаголник. Притоа помошта од трибините е посакувана и добредојдена и треба да претставува ветар во грб за Горан Пандев и компанија. Таа е само еден од адутите на нашата репрезентација. Вториот е домашниот терен, континуитетот на добри игри во пријателските и квалификациски дуели, формата на капитенот кој се најави кај селекторот Јаневски со гол за Наполи против Удинезе во неделниот меч во Серија А. Радуваат и вестите за Иван Тричковски кој ги надминува проблемите со задната ложа, се врати во тимот на Бриж, ги одработи сите задачи на стручниот штаб на тренинзите за време на овие подготовки и се очекува негов нас��ап и вечерва. Формата и кај останатите е подем, а здравствениот билтен е повеќе од поволен што значи дека Јаневски е на слатки маки и со прилика да го состави најсилниот тим од сиот расположлив потенцијал.
„Мора да ја искористиме оваа еуфорија во наша полза и не смее да дозволиме да се одрази како притисок. Сите ние сме професионалци и многупати во кариерите сме настапувале пред полни трибини. Работевме добро во тренинзите и се наоѓаме во добра форма. Ако ги исполниме замислите на селекторот можеме до позитивен резултат“, вели стоперот на репрезентацијата на Македонија и капитенот на бундеслигашот Мајнц 05, искусниот Николче Новески.
Вечерашниот натпревар меѓу фудбалските репрезентации на Македонија и Хрватска ќе почне во 20,30 часот. За правдата е делегиран судиски мколегиум од Данска на чело со Петер Расмусен. Од организаторот на мечот, Фудбалската федерација на Македонија (ФФМ), апел за сите што обезбедија влезници за „Филип Втори“ дека вратите на стадионот ќе бидат отворени од 17 часот до 19.45 часот, дека ќе има засилени мерки на безбедност и ригорозни контроли, дека е забрането внесување на предмети што може да завршат на терен или да ја загрозат безбедноста на присутните на трибините како и забраната за носење на клупски обележја.
|
