11.10.2012, 16:16 Македонија им се поклони на хероите од НОБ
Денеска бројни делегации - претставници од Владата, од Сојузот на борците, од Кабинетот на претседателот Иванов, пратеници од Собранието, од АРМ и други положија цвеќе на спомениците на народните херои
Македонија ја одбележа 71-годишнината од почетокот на антифашистичката борба и народноослободителната војна, која последниов период беше дел од политичките препукувања. Денеска бројни делегации - претставници од Владата, претставници од Сојузот на борците, од Кабинетот на претседателот Ѓорге Иванов, пратеници од Собранието, од АРМ, претставници на училишта, јавни институции и установи, политички партии и граѓански организации положија цвеќе на спомениците на народните херои. Иако, беа најавени меѓу оние што требаше да положат цвеќе на Партизанските гробишта во Бутел и на споменикот на Методија Андонов Ченто, сепак, во делегациите не беа министерот за економија Ваљон Сарачини и министерот за правда Блерим Беџети.
Комплетниот државен врв присуствуваше на Свечената академија во Домот на АРМ. Таму забележливо беше и присуството на најактуелниот пратеник на ДУИ во моментов, Талат Џафери, додека како претставник на опозициската СДСМ беше пратеникот Марјанчо Николов. ДПА повторно беше „оправдано“ отсутна.
Говорниците беа единствени дека со одлуката да пристапи кон антифашистичката коалиција Македонија застана на страната на прогресивното човештво, а против фашизмот како најтемна идеологија од современата историја и најсилна негација на општоцивилизациските и демократски вредности.
„Партизаните верувајќи во своите цели посветено се изборија за слободна и независна Македонија“, рече претседателот на Собранието Трајко Вељаноски. Според него во модерна Македонија совршено јасно се отсликуваат вредностите кои ги имаат втемелено учесниците во Народноослободителната борба.
„Ние денес живееме токму по начинот за кој тие се залагале македонскиот народ да живее во мир со сите народи кои ги почитуваат принципите на братство, еднаквост и солидарност. Взаемната почит е темел за добри односи и добар соживот. Тие наши идеали се поклопуваат со оние на НАТО-алијансата, што е и главната причина за успешното пријателство и сојузништво со земјите членки на оваа организација“, додаде Вељаноски.
На Свечената академија се обрати и претседателот на боречката организација Тодор Атанасовски, кој ги замоли присутните со едноминутно молчење да им се оддаде почит на сите загинати и починати борци од НОБ.
Инаку, за време на окупацијата од Македонија беа интернирани 58.000 лица, а покрај злосторствата што окупаторите ги вршеа врз недолжното цивилно население, земјата претрпе и огромни економски штети. Круна на борбата се одлуките на Првото заседание на АСНОМ во 1944 година, со кои се оживотворени повеќевековните идеали за основање македонска држава. (Н.К.)
|
