11.10.2012, 12:32 Кирил Спироски од Правен има најмногу гласови за нов лидер
Кирил Спироски е новиот претседател на Студентскиот Парламент при Универзитетот „Св. Кирил и Методиј“ - информираат од СПУКМ по пребројувањето на 90 проценти од гласачките ливчиња по вчераодржаните избори на 23 факултети на УКИМ.
Како што информира СПУКМ, студентот на Правниот факултет, Спироски има убедливо водство со над 4.400 добиени гласа, а зад него се другите двајца кандидати во изборната трка - Трајче Митрев од Стоматолошкиот факултет, кој од досега преброените гласови добил 2.400, и Шевал Нуредин од Економскиот факултет, кој освоил околу 900 гласови.
Според информацијата на СПУКМ, на изборите вчера, од 9 до 17 часот, излегле околу 8.500 студенти од Скопскиот универзитет.
Информациите пак, на „Младински образовен форум“ кои вчера беа излезени на терен, говореа дека излезноста е мала. Во секој случај, дури и еден студент да излегол да гласа, изборите се легитимни и тој ќе претставува 50.000 студенти колку што има на УКИМ.
Спироски ќе го замени досегашниот претседател на СПУКМ Иван Живковски.
„Плусинфо“ вчера пишуваше дека изборите СПУКМ се распишани вон Статутот на УКИМ, поради што формално-правно се нелегитимни.
На ова реагираше Живковски, кој рече дека правилникот според кој се водевме бил стар, иако тој самиот го испрати до медиумите.
|
