13.10.2012, 12:02 Одбраната на „Телеком“ ја спори надлежноста на американските судови
Одбраната на тројцата обвинети побарала судот да го отфрли случајот на тужителот, американската Комисија за хартии од вредност СЕЦ
Одбраната на тројцата поранешни менаџери во команијата Маѓар Телеком, Елек Штрауб, Андраш Балог и Тамас Морваи, обвинети во САД за корумпирање на властите на Македонија и на Црна Гора, поднела барање да се отфрли процесот поради тоа што судот во Њујорк немал надлежност над овој случај.
Одбраната на тројцата обвинети, кои ги застапуваат некои од најголемите адвокатски куќи во Њујорк и Вашингтон, побарала судот да го отфрли случајот на тужителот, американската Комисија за хартии од вредност СЕЦ.
Застапниците на СЕЦ, на вчерашното рочиште во Јужниот, окружен суд во Њујорк, возвратиле дека обвинетите користеле лажни документи, вклучително и на американска територија, значи дека американските судови имаат надлежност да го судат овој процес. Се очекува конечната одлука за барањето на одбраната судијата Ричард Саливан да ја донесе во февруари идната година.
Во овој процес, Штрауб, Балог и Морваи се обвинети дека во делот за Македонија, во 2005 година направиле недозволен договор со македонската Влада чија цел била да се спречи отворањето на македонскиот телекомуникациски пазар за конкурентски компании. За возврат, менаџерите на Маѓар Телеком, компанија под капата на германскиот Дојче Телеком која е доминантен сопственик на Македонски телекомуникации и Т-Мобиле, тогашниот Мобимак, склучувале договори за фиктивни консултантски услуги и така прелевале пари од компанијата.
Маѓар Телеком и Дојче Телеком веќе им платија казна од 95 милиони долари на американските власти, поради корумпирањето на властите во Македонија и во Црна Гора.
|
