Девет македонски компании меѓу најдобрите 100 во ЈИЕ

Неколку македонски компании се најдоа во најдобрите 100 на веб- страницата „Си њус“, која врши рангирање на најголемите компании во Југоисточна Европа. Во годинешното петто по ред презентирање на најдобрите во Југоисточна Европа, на листата од врвни 100 компании во регионот, на 59. место се најде рафинеријата „Окта“, која и лани беше единствената компанија од земјава на оваа листа.

Меѓу врвните 100 банки за 2012, Македонија е присутна со три - Комерцијална е позиционирана на 56. место, Стопанска банка АД Скопје на 59., а НЛБ Тутунска е на 64. место.

Исто како и минатата година, и оваа, во делот на врвните 100 осигурителни компании се најдоа „Триглав осигурување“, кој е рангиран на 64. позиција, следуваат „Еуролинк осигурување“ и „Сава осигурување“ на 83., односно 84. место, „Кјуби“ на 86. и „Осигурителна полиса“ на 98. место.

На прво место на листата на најдобрите 100 компании е „ОМВ Петром СА“ од Романија. Меѓу банките најдобра е Комерцијална банка од Романија, а во делот на осигурувањето на прво место е „Заворовалница“ - Триглав од Словенија.

Годишното рангирање на „Си њус“ ги вклучува компаниите со најдобри перформанси во Албанија, Босна и Херцеговина, Бугарија, Хрватска, Косово, Македонија, Молдова, Црна Гора, Романија, Србија и Словенија.

„Си њус“ е специјализиран портал кој нуди информации во областа на бизнисот и пазарите, со фокус на ЈИЕ и кој објавува годишно рангирање на најголемите компании во регионот.