Осудениот за убиството во „Биг фиш“ наскоро на слобода?

Психијатриското вештачење за Тони Денковски, обвинет за трикратното убиство во ресторанот „Биг фиш“, не е завршено. Тој бил прегледан од вештите лица, но стручниот наод и мислење се' уште е во фаза на изработка.

Продолжението на повторениот судски процес, судечкиот совет го закажа за 26 овој месец, односно на само два дена пред истекот на рокот од две години, во кој период судот треба да донесе пресуда за пукањето кое се случи на 2 септември 2010 година во ресторанот „Биг фиш“, во скопската населба Аеродром. Во спротивно, Тони Денковски ќе се најде на слобода.

Јавното обвинителство инсистира продолжението на судењето да биде закажано порано, но бранителите на Денковски, кој денеска не беше спроведен во судот, инсистираат да не се брза во името на правдата. Тие реагираат на одлуката на Кривичниот совет што рокот од две години бил поместен за 4 ноември, а не 28 овој месец како што тие пресметале.

Скопјанецот Тони Денковски, кој се товари за убиство на велешаните Јордан Јорданов со прекар ’Ркулот и Влатко Андревски и на скопјанецот Владо Милошев тврдеше дека делото го сторил поради заканите по живот кои му биле упатуван нему, но и на неговите најблиски. Тој за стореното еднаш веќе беше осуден на казна доживотен затвор и на дополнителни пет години затвор поради недозволено подедување на огнено оружје. Оваа одлука беше потврдена од Апелацискиот, но поради многубројни недоследности беше укината од Врховниот суд.(Љ.С.)