11.10.2012, 12:07 Македонија одбележува 71 година од антифашистичкото востание
По повод празникот, владини делегации денеска ќе положат цвеќе на спомениците и паметниците на народните херои
Република Македонија денеска одбележува 71 година од почетокот на антифашистичкото востание и народноослободителната војна.
На 11 Октомври 1941 борците од Првиот прилепски партизански одред го нападнаа бугарскиот полициски участок и телефонско-телеграфската мрежа во Прилеп, што го означи почетокот на организираното востание на македонскиот народ против бугарскиот, италијанскиот и германскиот окупатор за ослободување на земјата. Следниот ден, на 12 октомври, се огласија и партизаните од Кумановскиот одред.
11 Октомври е продолжување на слободарските традиции на македонскиот слободољубив народ проникнати во Карпошовото, Разловечкото, во Кресненското и во Илинденското востание, но и во напорите за социјално и национално ослободување вложени во Балканските војни и во Првата светска војна.
Со одлуката да пристапи кон антифашистичката коалиција Македонија застана на страната на прогресивното човештво, а против фашизмот како најтемна идеологија од современата историја и најсилна негација на општоцивилизациските и демократски вредности.
Македонскиот народ самостојно се избори за својата слобода. Од првите партизански одреди кои ја почнаа борбата, Народноослободителната војска на Македонија на крајот од четиригодишната војна прерасна во доброорганизирана 110-илјадна армија со воени формации од највиок ранг како корпуси и дивизии.
За време на окупацијата од Македонија беа интернирани 58.000 лица, а покрај злосторствата што окупаторите ги вршеа врз недолжното цивилно население, земјата претрпе и огромни економски штети. Круна на борбата се одлуките на Првото заседание на АСНОМ во 1944 година, со кои се оживотворени повеќевековните идеали за основање македонска држава.
Минувајќи го патот на својот повеќедецениски развој и растеж како дел од СФРЈ, а 20 години како самостојна држава, пребродувајќи го конфликтот во 2001 година и од него произлезениот Рамковен договор, Македонија, која е полноправна членка на Обединетите нации, денес чекори на патот кон евроатлантските интеграции.
Во Македонската академија на науките и уметностите денеска напладне ќе биде врачена државната награда „11 Октомври“ за животно дело за 2012 година, за остварувања во областа на науката, културата и уметноста, здравството, и спортот и хуманоста.
Во областа на науката високото признaние годинава го добиваат академик Владо Камбовски и професорот Димитар Мирчев, а во областа на културата и уметноста писателот Веле Смилевски и оперскиот уметник Борис Трајанов. Наградата „11 Октомври“ за животно дело во областа на здравството, спортот и хуманоста ќе му биде доделена на кардиологот Самуел Садикарио.
По повод празникот, владини делегации денеска ќе положат цвеќе на спомениците и паметниците на народните херои.
Седумдесет и првата годишнина од македонското народно востание вчера беше одбележана со свечена академија во Домот на АРМ, на која се обрати претседателот на Собранието, Трајко Вељаноски.
|
