10.10.2012, 14:53 Политичка тројка
ЕК ги амнестира амнестираните од ОНА и бара да се реши статусот со „жртвите од конфликтот во 2001 година“, а не само на бранителите. Најлоша оцена ЕК ни даде за борбата против корупцијата
Слободанка Јовановска
Македонија ги исполни задоволително политичките критериуми - е главната оценка на Европската комисија денеска во извештајот за прогрес, која беше аргумент по четврти пат да ни даде препорака за преговори. Во споредба со минатата година, кога Македонија беше предупредена дека изгубила цела година и дека тоа не треба пак да и' се случи, годинава најспоменуваната оцена на Брисел е дека „има некаков прогрес“, или нашки кажано тројка.
Поконкретно, Брисел не' пофалува и ни забележува за следните нешта: на позитивната страна стои дека Владата усвоила измени на изборните закони, дека го почнала процесот на укинување на клеветата како кривично дело и дека првпат донела преглед на исполнувањето на Охридскиот договор, како три клучни напредоци. Сепак, стои натаму, моментумот во реформите треба да се одржи во сите области и да се осигура тие да се имплементираат, а фокусот да биде на владеењето на правото, на слободата на изразување, на меѓуетничките односи и како нов збор што се почесто се слуша - помирувањето.
На страната на критиките, ЕК, исто така, има што да каже. „Тензиите меѓу заедниците по насилните инциденти во првата половина на годинава предизвикаа загриженост. Владата одговори зрело на овој предизвик и треба да продолжи со јакнење на меѓуетничките односи и помирувањето, вклучувајќи го статусот на жртвите од конфликтот од 2001 година“, стои во извештајот, кој очигледно бара власта да не прави разлика меѓу ОНА и бранителите и да го реши ова прашање преку законот што го блокира македонскиот парламент. ЕК, исто така, гледа „некаков напредок“ околу употребата на законот за јазиците, што веројатно се однесува на говорењето на министрите на албански не само во парламентот, туку и на други меѓународни или домашни настани, како што е обраќањето на Теута Арифи во присуство на ЕУ-функционерите и на Фатмир Бесими во АРМ. Зошто „некаков“ прогрес и до каде треба да оди овој процес е прашање за кое треба да даде објаснување не само Брисел, туку и нашиот државен врв. За политичкиот дијалог ЕК вели дека се одржува и дека клучните барања на опозицијата биле земени предвид при утврдување на деловникот. За изборната рамка, сепак, се забележува дека не се исполнети сите препораки на ОБСЕ, а во функционирањето на коалицијата Брисел не гледа проблем и оценува дека таа таа продолжува и била успешна во ставањето на евроинтеграцијата во центарот на вниманието. Во заклучоците од извештајот ЕК не ги споменува како проблем односите со Бугарија, туку, напротив, генерално оценува дека Македонија во целина играла конструктивна улога во билатералните односи со соседите и дека тие односи натаму биле развивани.
И за реформата на јавната администрација ЕК оценува дека е направен „некаков“ прогрес, но дека таа и натаму не е транспарентна, професионална и независна и во неа не се почитува принципот на напредување според заслугите. За судството стои дека се потребни натамошни напори за да се гарантира неговата независност и непристрасност, дека се потребни соодветни процедури за отпуштање, а напредок има само во намалувањето на бројот на нерешени случаи. За корупцијата оценката е најлоша, односно дека има „малку видлив прогрес“ во однос на крајните резултати. Дека капацитетот за пресметка со корупцијата е слабо зголемен, дека се' уште нема листа на завршени високопрофилни случаи и дека корупцијата преовладува во многу области и останува сериозен проблем. Како проблем се посочуваат и стоте меѓународни потерници од кои нема епилог, додека во сферата на човековите права се нагласува силно состојбата со медиумите. „Кривичниот закон треба да биде сменет, а Советот за радиодифузија треба да докаже дека следи недискриминаторски и транспарентен пристап“, стои во извештајот со забелешка дека „останува широкораспространетата загриженост околу недостигот од плурализам и самоцензура“. Препораката е да се направат уште напори за да се реши проблемот со транспарентноста на владиното финансирање и работничките права на новинарите. ЕК повторно ни забележува и за недавањето права на хомосексуалците, ги „амнестира“ амнестираните од ОНА и не' прекорува за билатералниот договорот за негонење со САД.
За името, кое практично влезе на голема врата во извештајот, ЕК има сосема нов пр��стап, што го потврди висок функционер на ЕК на затворен брифинг во Брисел, и според кој досега името само се посочуваше како проблем, а сега станува формален услов за нашата евроинтеграција, иако се уважува и хашката пресуда. „Преговорите под покровителство на ОН треба да продолжат со зголемена енергија, како и билатералните контакти и средби. Потезите и изјавите што можат да влијаат негативно на добрососедските односи треба да се избегнуваат“, стои во документот откако претходно јасно се бара да и' се овозможи на Македонија да добие преговори, како нешто „неопходно за да се консолидираат реформите, да се засили владеењето на правото и да се зајакнат меѓуетничките односи“.
|
