„Оне“ со поголеми приходи

Засега нема официјални најави за продажба на „Оне“ и на неговиот сопственик „Телеком Словенија“

Продажбата на телекомуникацискиот оператор „Оне“ и неговиот сопственик, групацијата „Телеком Словенија“, се' уште е неизвесна. Според претседателот на Бордот на директори на групацијата, Рудолф Скобе, кој деновиве е во посета на Македонија, моментно се разгледуваат неколку сценарија, меѓу кои и опциите „Телеком Словенија“ и нејзините фирми-ќерки од регионот да се продаваат заедно или поединечно. Во меѓувреме, Скобе рече дека „Оне“ останува посветено да работи на македонскиот пазар во насока на подобри услуги и задоволство на корисниците и зголемување на финансиските приходи. Компанијата не планира отпуштања вработени, туку, како што најави извршниот директор Цирил Кафол, нови 30 вработувања со вклучување во проект на Агенцијата за вработување.

Телекомуникацискиот оператор во првата половина од годинава споредено со овој период лани оствари раст на приходите од три проценти, но и негатива во нето-добивката од 3,7 отсто.

Во првата половина од годината групацијата генерираше 391,1 милион евра приходи во работењето, со што бележи пад од три проценти во споредба со истиот период лани. ЕБИДТА достигна 132,2 милиона евра приходи од работењето. Заработката пред плаќање камати и даноци била за три проценти повисока, што значи 41,3 милиони евра, додека нето-профитот се покачил за пет проценти и достигнал 26,5 милиони евра. Финансискиот нето-долг е намален за 27 проценти во текот на последните 12 месеци и изнесува 325,8 милиони евра на крајот на правата половина од годината.

„’Телеком Словенија‘ финансиски стои многу добро и има средства да инвестира и во други перспективни проекти и во регионот. За Македонија имаме план приходите да растат“, рече Скобе, кој очекува „Оне“ да почне да генерира оперативна добивка веќе следната година. „Македонија, како и целата групација, се малку под реализација на приходите од лани, но и приходите од оваа година се во пораст, тие се здрави што може да се забележи од резултатите“, наведе Скобе. (С.Н.)