11.10.2012, 15:52 Адеми ги избра „коцкестите“, Македонија втора опција
„Во Хрватска пораснав, Хрватска ми даде се'“, порачува играчот на Динамо Загреб
Аријан Адеми го привлече вниманието на овдешната јавнноста со игрите во Динамо Загреб. Ова посебно важи за последните три меча во „модриот“ дрес што ги одигра на врвно ниво и сето тоа беше доволна препорака да се тргне по неговите услуги за настап во фудбалската репрезентација на Македонија. По неговата мајка може да добие македонско државјанство и кога се понадевавме дека конкуренцијата во нашиот национален тим ќе се зголеми во квалитативна смисла, од Хрватска стигна неповолна вест по нас во пресрет на вечерашниот дуел на „Филип Втори“ во квалификациите за Светското првенство во Бразил во 2014 година.
Запрашан дали е тешко да донесе одлука за која земја ќе настапува, Адеми порача:
„Мојата одлука не е едноставна. Ќе играм за Хрватска и тоа е јасно. А, доколку не добијам покана постои и друга можност, Македонија, сепак, втора опција. Во Хрватска пораснав, Хрватска ми даде се. Ете, сега знаете се, каква е мојата одлука“, стои во изјавата на Адеми за „Вечерњи лист“.
До пред неколку месеци Аријан Адеми не беше ниту во небо ниту на земја. Се наоѓаше меѓу Динамо Загреб и Локомотива, па затоа размислуваше за било какво друго позајмување со цел само да игра. Но, сега во Динамо, во последните три натпревари, игра одлично. Адеми за „Вечерњи лист“ ги објаснува и причините што доведоа со промена во неговите изданија.
„Тренерот ми даде задача што повеќе ми одговара. Ми даде слобода малку повеќе да се приклучувам во нападот. Секако дека мора да работам и дефанзивни задачи, но тоа е улога што ми одговара“, вели Адеми.
Адеми не е првиот фудбалер со македонски корени по кого челниците на ФФМ неуспешно се обиделе да го доведат во националниот состав. Игњатовски, Качаниклиќ, Шаќири...се дел од имињата што ФФМ посакуваше да ги види во дресот на Македонија. Да се надеваме дека Адеми ќе биде последна лекција за првите луѓе на македонската “куќа на фудбалот“, наместо да чекаат Македонија да биде втора опција на дел од нив, поубаво би било доколку им дадат шанса на младите фудбалски имиња кај нас што навистина заслужуваат да бидат дел од националниот состав. (С.Ѓ.Д.)
|
