11.10.2012, 14:49 Прилеп го одбележа 11 Октомври
Градоначалникот Марјан Ристески акцентирајќи го големото дело на борците од НОБ, упати порака да не се заборават овие светли датуми од македонската историја
Прилеп - Со импресивен огномет, импровизиран напад на Участакот, градот првоборец Прилеп, го одбележа и годинава традиционално големиот национален празник 11 Октомври и 71-та годишнина од почетокот на Народноослободителната борба. Делегации од Општината, Сојузот на борците, политичките партии и граѓани положија венци и свежи цвеќиња пред бистите во Алејата на народните херои, на Могилата на непобедените, спомениците на Методија Андонов-Ченто и Кузман Јосифоски-Питу. Прилепските борци, членови на општинската организација потсетија на големото дело на народните херои и револуционери кои ги дадоа своите животи, кои се вградени во денешната слобода.
„Благодарение на антифашистичката борба, кога македонскиот народ се вклопи во таа права страна против фашистичката наезда, Македонија стана слободна, независна и демократска држава”, изјави Круме Соколоски, потпретседател на прилепската боречка организација.
Градоначалникот Марјан Ристески акцентирајќи го големото дело на борците од НОБ, упати порака да не се заборават овие светли датуми од македонската историја.
Во чест на празникот беше промовирана монографијата „Победничкиот истрел – 71 година од утрешнината“, чиј автор е новинарката Елизабета Митреска. На преку 100 страници, во поглавја со факти, оригинални документи и фотографии, но и со сведоштва и сеќавања, се опфатени настаните пред 11 октомври (од априлската окупација 1941), приликите во Прилеп, во Македонија, подготовките, акциите, протестите. Главно место има самиот напад на 11 Октомври, како се одвивал, учесниците, сведоштата, сеќавањата. Има место за одредот, борците, и за песната “А бре Македонче”, прво химна на Одредот, па најпозната во НОБ и до ден денес. Во посебно поглавје за Востанието се кажувањата на повеќе личности, почнувајќи од Кузман Јосифоски Питу, Ченто, Колишевски, Глигоров, па до денешните актуелни политичари Иванов, Вељаноски, Груевски, дадени во одделни пригоди. Има простор за улогата и на Методија Шаторов-Шарло како тогашен секретар на Покраинскиот комитет на Комунистичката партија.
„Како новинар не ретко со годините правев анкети за значењето на празникот, или најчесто, како што велат прилепчани ’за пукањето‘. Можеби токму одговорите на тоа што знаат за 11 Октовмери, со дистанца, еве, од седум децении, ме поттикнаа да ја подготвам публикацијата. Овие страници ја понудуваат и - приказната за херојствата, за одрекувањата, за луѓето кои се дале себе си за највисокиот идеал- слободата, независноста, да решаваш сам за своето. По секоја цена. За себе, за децата, за внуците…“, истакнува Митреска. (М.Т.)
|
