10.10.2012, 16:25 Опозицијата го поздрави напредокот
СДСМ го поздрави, како што рекоа од партијата, формалниот напредок во евроинтеграциските процеси и фактот што Македонија ја задржува европската агенда како врвен приоритет. Опозициската партија го поздрави и враќањето на придавката „македонски“ во Извештајот.
Гордан Георгиев, потпретседател на СДСМ, изрази надеж дека овојпат, за разлика од претходните години, тоа ќе значи и конкретен исчекор на земјата кон полноправно членство во Европската унија.
„Како и во претходните три извештаи, така и во овој, покрај позитивните елементи, се содржат и сериозни забелешки. Без разлика на начините на кои се нотирани, меѓуетничките односи во земјата се затегнати и постојано се влошуваат. Иако има формален напредок, постои реално уназадување на состојбите со слободата на говор и демократијата, а односите со соседите повторно се наметнуваат како закана за нашите европски аспирации“, рече Георгиев.
Тој ја повика Владата да не ги издвојува, со триумфализам, само позитивните аспекти на овој Извештај, туку да ги разгледа, прифати и признае сериозните забелешки, како прв чекор кон подобрување на состојбите во тие области.
Нано Ружин, член на Извршнот одбор на ЛДП, оцени дека годинешниот Извештај на Европската Комисија е позитивен, надежен , кредибилен и отвара можности за отпочнување на преговорите со ЕУ. Но, тој предупреди дека нема простор за еуфорија и триумфализам, бидејќи Владата повторно е соочена со потребата за компромис со Грција.
„Со овој извештај Владата повторно е соочена со решавање на спорот за името, како една од првите обврски при евентуалното отпочнување на пристапните преговори за членство во ЕУ“, рече Ружин. (П.Р.)
|
