Прашањето за бранителите секој го чита по свое

Македонските политичари сметаат дека EK бара да се реши само статусот на бранителите, а Албанците тврдат дека се бараат исти права и за припадниците на ОНА

Татјана Поповска



Бара ли Европската комисија (ЕК) да се изедначи статусот на бранителите со припадниците на ОНА, со што сите би имале еднакви права, е дилемата што се појави по добивањето на извештајот од Брисел за напредокот на Македонија оваа година. Македонскиот и албанскиот политички блок различно ги толкуваат пораките од ЕУ во врска со прашањето за законот за бранители.

Додека за едните ЕК само бара да се реши проблемот што предизвика владина криза и блокирање на парламентарната Комисија за труд и социјална политика, другите сметаат дека во извештајот е прецизно наведено дека се бара изедначување на правата на припадниците на безбедносните сили и поранешните припадници на ОНА.

Во извештајот на Комисијата пишува дека „тензиите меѓу заедниците по инцидентите во првата половина на годинава предизвикаа загриженост. Владата одговори зрело на овој предизвик. Владата и во иднина треба да продолжи со јакнењето на меѓуетничките односи и помирувањето, вклучувајќи го и статусот на жртвите од конфликтот од 2001 година“. Истовремено, ЕУ забележува дека односите во Владата биле засегнати поради различните мислења околу статусот на жртвите од конфликтот од 2001 година.

„Коалициските партнери треба да го продолжат дијалогот за да најдат решение за ова прашање и да обезбедат стабилност. Собраниската Комисија за труд и социјална политика продолжува да расправа за предлог-законот за бранителите, чија цел е да обезбеди поддршка за жртвите од 2001 година. Треба да се најде заеднички прифатливо решение кое ќе обезбеди помирување, врз основа на неодамнешниот владин извештај за Охридскиот рамковен договор“, се наведува во извештајот.

Портпаролот на ДУИ, Бујар Османи, вчера го поздрави тој дел од извештајот на ЕК, кој, како што вели, предвидува дека треба да се реши прашањето на сите жртви во конфликтот во 2001 година.

„Тоа прашање ќе мора институционално да се реши. Штом ЕК го бара тоа, значи имаме меѓународна поддршка“, вели Османи, кој додава дека тоа е предвидено и во Прегледот на Рамковниот договор, кој е усвоен на владина седница.

Истите аргументи вчера ги искористи и пратеникот Талат Џафери, кој го прекина молкот на Комисијата за труд и социјална политика, чија работа повеќе од еден месец ја блокира за да го спречи донесувањето на законот за бранителите.

Во ВМРО-ДПМНЕ вчера избегнаа да го коментираат овој дел од извештајот и посочија на ставот на премиерот и лидер на партијата, Никола Груевски, што го искажа на седницата за изгласување недоверба на Владата. Груевски тогаш рече дека законот за бранители треба да се донесе, но со него не треба да бидат опфатени припадниците на ОНА.

Поранешната вицепремиерка за евроинтеграции, Радмила Шекеринска, не се согласува со позициите на ДУИ. Смета дека ЕУ не прави изедначување меѓу припадниците на безбедносните сили и борците на ОНА.

„ЕК посочува дека владејачката коалиција треба да си ги реши проблемите. Но, не лицитира како би го направиле тоа. Тие само велат дека треба да се најде заемно прифатливо решение, кое ќе поттикне помирување“, вели Шекеринска.

Бесими: Се' што не е забрането со Устав е дозволено

За министерот за одбрана, Фатмир Бесими, вообичаено е во своите обраќања пред Армијата да зборува на албански јазик. Тој, во интервју за МИА, објаснува дека командата и пишаните наредби во АРМ се на македонски јазик, а обраќањето и говорот се гарантирани со уставното право - над 20 проценти од граѓаните кои говорат еден јазик да можат да го користат својот јазик.

„Кога станува збор за говор, нема ниту едно законско ограничување. Има уште една друга основна одредба во Уставот – се' што не е забрането е дозволено. Мислам дека тоа беше чисто некоја сензација која некој ја искористи во оваа фаза, но не е ништо ново. Оние што се внатре во институцијата го знаат тоа“, вели Бесими.