11.10.2012, 15:03 Ставрески: Ќе донесеме свеж капитал и ќе им исплатиме на фирмите
Министерот за финансии и гувернерот на Народната банка, Димитар Богов, од денеска учествуваат на Годишното собрание на Светска банка и ММФ
Министерот за финансии Зоран Ставерски денеска од Токио порача дека Владата ќе донесе свеж капитал од надвор, меѓу другото и од Светска банка, односно дека ќе се задолжи со цел навреме да ги исплати обврските кон стопанството, но и да ги зголеми пензиите и субвенициите.
„Нема да останеме без мерки и инструменти со кои, во рамки на она што го имаме на располагање, ќе се бориме последиците од ев��опската економска криза да бидат помали“, рече Ставрески. Тој, како што пренесува МИА, од вчера учествува на Годишното собрание на Светска банка и Меѓународниот монетарен фонд, чиј фокус се токму негативните економски движења во Европа и светот.
„Ќе настојуваме да донесеме свеж капитал од надвор, меѓу другото и од Светска банка, со цел подобрување на ликвидноста на економијата. Обврските кон стопанството навреме ќе се сервисираат, онака како што беше соопштено од премиерот, за да ја подобриме ликвидноста на приватниот сектор. Ќе ги зголемиме примањата на оние категории најзасеганти од кризата, односно социјалните категории, пензиите, субвенциите“, изјави Ставрески, додавајќи дека Владата ќе се обиде да ги одржува на повисоко ниво и капиталните инвестиции. Според него, сето тоа се инструменти кои ја прават Македонија малку поразлична од другите.
Но, не може да се каже дека економската криза нема да има последици и врз нас. „Покрај информациите што доаѓаат за состојбите во еврозоната, за фискалните ризици, слабиот раст на американската економија и забавениот раст на Мексико, Бразил, Кина, кои беа двигателите на растот изминатите две години, дополнети со нерешавањето на должничката криза во Европа, очигледно е дека не можеме да бидеме преголеми оптимисти“, објасни Ставрески. Според него, не може да се очекува дека македонската економија ќе се движи драстично различно од она што се случува во Европа.
Инаку, Ставрески и гувернерот на Народната банка на Македонија, Димитар Богов, од вчера учествуваат на Годишното собрание на Светска банка и ММФ. Ставрески најави дека овој настан е добра шанса за средба со директорите во Светска банка и ММФ што се задолжени за Македонија, како и потпретседателите и извршните директори на овие две водечки меѓународни институции, и да се слушнат нивните проценки за состојбите во светската економија. Годишните средби се можност тие да се запознаат со состојбите во Македонија, со она што се случува на економски план, со гледиштата на владата, како и со мерките и политиките што ги презема во борба со кризата. За денес е најавено средба на Ставрески со потпретседателите и извршните директори на СБ и ММФ. (Ек.Р.)
|
