11.10.2012, 15:31 Атина во декември ќе ги отвори картите
Грчката влада го чека одговорот од македонска страна на меморандумот што беше испратен. Атина тврди дека за него добиле меѓународна поддршка
Атина - Грција е претпазлива околу отварање на картите за извештајот на Европската комисија за напредокот на Македонија кон ЕУ. Од грчкото Министерство за надворешни работи се на ставот дека конечната одлука за европската перспектива на Македонија ќе ја донесе Советот на состанокот во декември, каде ќе ја претстават и својата за нивното гледање како Македонија напредува кон ЕУ. Атина инсистира дека во последните три години Советот има јасна и цврста позиција што се однесува до спорот за името и македонската влада требало да ги почитува овие одлуки и ставови на Советот. Грција апелира македонската влада да работи на подбрување на работите за кои ни забележува ЕК, а смета дека „уцената“ дека нема да се прифати извештај во кој нема „македонски“ не и' доликувало на кандидат-држава.
Грчкиот весник „То Вима“ пишува дека пред објавувањето на извештајот со еврокомесарот за проширување, Штефан Филе се сретнала грчката еврокомесарка за поморски прашања, Марија Даманаки. „Филе, според нашите информации, изразил сериозни реакции на барањето на Даманаки да не се побара одредување на датум за отпочнување на преговори“, пишува „То Вима“, посочувајќи дека Филе останал на ставот презентиран во Грција дека отпочнувањето преговори ќе го олесни преговарачкиот процес за името.
Во овој момент со сигурност може да се каже дека Грција притиска да се добие одговор на нејзината иницијатива односно меморандумот за соработка, за кој од македонската влада се' уште немаат добиено одговор. Како што потенцираше потпаролот на грчкото министерство за надворешни работи, Григорис Делавекурас на брифинот со новинарите, од сите меѓународни партнери и соговорници кои се известени за овој меморандум имаат добиено позитивна оценка за ова иницијатива и ја оценуваат како позитивен чекор со кој Грција се обидува да претстави излез од беизлезната ситуација во која се наоѓа спорот за името. (М.П.)
|
