Македонскиот одговор на грчкиот меморандум во декември

Колку е рана „раната фаза „ на Штефан Филе?

Македонскиот одговор на грчкиот меморандум ќе почека соодветен тајминг и, како што се дознава, ќе биде подготвен и испратен во декември, пред самитот на ЕУ на кој ќе се најде на дневен ред и одлуката за нашиот датум за преговори за членство.

„Пополека, нема да се брзаме“, е најавата од високи политички кругови, според кои во неговото пишување најверојатно ќе се консултира и Брисел. Тоа потврдува дека дипломатските напори наредниот период, до декември, ќе бидат фокусирани на отворање на патот за деблоки��ање на евроинтеграцијата, а вистинските преговори за името ќе дојдат потоа, иако генерално во одговорот Македонија треба да ја каже рамката што е прифатлива за неа во спорот.

Дилемата, колку е рана „раната фаза“ што ја предложи еврокомесарот Штефан Филе за решение за проблемот со името денеска, сепак, не ја дефинираше прецизно вицепремиерката Теута Арифи, како што претходно не го стори тоа и евроамбасадорот Аиво Орав, кој ја проектираше - од еден месец па до две години.Таа, како и другите македонски функционери, се фокусираше на позитивната страна на меморандумот, оценувајќи дека Балканот има потреба од позитивитет во дебатата за ЕУ , при што соседите што се веќе членки на Унијата треба да го поддржат проширувањето.Многу одоколу таа ја оцени и рамката на Филе за преговори за ЕУ паралелно со преговорите за името, оценувајќи дека таа е одраз на креативниот пристап на ЕК. „Ова е многу важен момент. Треба максимално да ја искористиме оваа позитивна атмосфера и поддршката од нашите партнери во ЕУ да продолжиме со истиот интензитет да работиме на реформите од нашата агенда и да градиме добри, отворени и позитивни односи со сите соседи“, порача Арифи. Според неа, Брисел сакал да ни даде дополнителен импулс за да го задржиме конструктивниот пристап во преговорите и во процесите кои овозможуваат полесна интеграција во Унијата.

Запрашана конкретно, дали Брисел има намера неформално да се вклучи во преговорите или и натаму тие ќе останат само во „милост на Метју Нимиц“, Арифи одговори кратко, дека остануваат под авторитетот на ОН.

Според најавите, самитот на ЕУ на кој ќе се расправа за идниот статус на Македонија ќе биде на 14 декември, а дотогаш не смее да се направи нешто што би било аргумент за Атина да го одбие предлогот на еврокомесарот Филе. Со оглед на тоа дека Македонија е пред избори, проценките се дека преговорите со ЕУ не би почнале пред април идната година, а тешко дека до тој период ќе се очекува и решавање на спорот за името, бидејќи тоа би имало големо влијание на исходот. Како и да е, Арифи вчера препорача овој предлог на Филе максимално да го искористиме, а ден претходно и премиерот Никола Груевски вестите од ЕК го оцени како чин што знаеме да го цениме и вреднуваме.Додека дојде време да се зафати со „жешкиот костен“, на Арифи и остана да ја собира славата од извештајот кој, и според неа, е најпозитивен досега и „многу, многу подобар од претходните“.Таа објави дека СЕП веќе го изанализирал по поглавја и ќе почне да прави нов патоказ за исполнување на барањата. (С.Ј.)