Едиторијал

Автобусот наречен ризик

Александра М. Митевска

- Сакам да ризикувам, се возам во автобус!

- Осмели се !

Вака се одвива дијалогот на една од социјалните мрежи, како алузија на последните инциденти што го потресоа главниот град на државата, навестија политички потреси и добија меѓуетничка димензија, поради деликатната клима во која подолго време преживува соживотот. Да не беше ситуацијата доволно сериозна, можеби и ќе се насмеевме на ироничните коментари, кои, сепак, ја отсликуваат реалноста - во Скопје и во целата држава.

Во најновата скопска безбедносно-политичка разгледница, нетрпеливоста меѓу различните етнички заедници се „превезува“ во модерните автобуси на јавното сообраќајно претпријатие - од едниот до другиот крај на градот. Од Кисела Вода до Ѓорче Петров, од Автокоманда до Бит-пазар.

Вирусот што се појави во Струга допатува и во Скопје, преку Тетово и Гостивар. Од него страдаат оние што најмалку се виновни. Оние, пак, кои се најповикани да се грижат за безбедноста на граѓаните и да дадат најголем придонес во градењето на довербата меѓу заедниците, имаат други приоритети. Како, на пример, рекламите од типот „Осмели се“.

Десетина момчиња, кои по игра на случајот се најдоа во погрешно време на погрешни автобуски станици, потешко се повредени во инцидентите што последниве денови се случија низ скопските булевари. Нивната етничка припадност во овој случај станува неважна. Поважно е дека биле претепани од нивни врсници. Дали некој ги поттикнал и како дошле до идеја да демолираат автобуси и да напаѓаат патници засега е мистерија. Може само да се претпоставува дека ги понела општата клима на недоверба која подолго време се создава во државата, додека коалициските партнери во Владата градат паралелни светови на двете страни на Вардар. И при тоа најважно е дали некој сокак на десниот брег ќе се вика „Голи оток“ или „Жртви на комунизмот“, а на левиот „Тирана“ или „Жртвите на Блаце“. Безбедноста на улиците стана проблем од второстепено значење!

За волја на вистината, претставници на Владата побрзаа да ја смират ситуацијата по инцидентите. Еден пратеник на ВМРО-ДПМНЕ, на пример, изјави дека такви работи се случувале и во други држави. И скопјани веднаш се почувствуваа поспокојно, откако сфатија дека може да биде уште понесигурно. Во други држави се случуваат граѓански војни, терористички напади... Кај нас работата не е отидена дотаму. Тука ситуацијата, веројатно, е под контрола, а кој ја контролира се' уште не знаеме?

Една пратеничка на ДУИ не случајно се посомнева дека станува збор за смислено сценарио. Но, не соопшти кој и зошто би го смислил, како што и не кажа кој треба да понесе одговорност поради тоа што во Скопје почна да се живее многу ризично.

Многу настани го потресоа соживотот за кратко време, за последните инцидентити во главниот град да може да се издвојат од општата перцепција дека нешто не штима во релациите меѓу заедниците и меѓу политичките фактори во државата. Меѓуетничките односи секогаш биле добра основа за собирање политички поени и за прикривање одредени политички поместувања. Како што и стравот кај граѓаните отсекогаш им бил добар сојузник на политичарите.

Жителите на Скопје веќе се доволно исплашени!