Да наздравиме со чаша вино

На плоштадот „Македонија“, вечерва со почеток во 21 часот, стартува шестото издание на фестивалот за промоција на вино „Виноскоп“

Шестото издание на фестивалот за промоција на вино „Виноскоп“ стартува вечерва, со почеток во 21 часот, на плоштадот „Македонија“. Оваа година ќе се претстават 19 производители на вино, меѓу кои се винарниците „Стоби“, „Тиквеш“, „Бовин“, „Сковин“, „Шато Камник“, „Шато Сопот“,„Попов“, „Попова кула“, „Филовски“, „Визба Валандово“, „Вардарска Долина“, „Картал“, „Пивка“, „Дудин“, „Изворно“, „Имако“, „Винарија Охрид“, „Пирган“ и „Бахус-Алтан ракија“.

Музичката програма претежно ја сочинуваат македонски изведувачи: Игор Џамбазов и „Гуру Харе бенд“, „Нокаут“, Нино Величковски, Миле Кузмановски... Официјалниот почеток на фестивалот ќе го означат министерот за земјоделство, шумарство и водостопанство Љупчо Димовски и градоначалникот на Скопје, Коце Трајановски.

„Ова е традиционална манифестација што ја организира Град Скопје. Целта е да се афирмира производството на вино во Република Македонија, како и да се промовираат македонските вина во државата и надвор од Македонија“, изјави Трајановски на вчерашната прес-конференција во Град Скопје.

Фимка Шопова-Темова од организацискиот тим на фестивалот информираше дека и годинава, како и досега, посетителите можат да уживаат во виното и храната преку принципот на ваучери. Основната цена на едно вино ќе биде 70 денари, а понатаму винарниците ќе одредуваат, во зависност од квалитетот на виното кое го продаваат.

„Ново е тоа што годинава посетителите ќе можат да си купат сувенир од фестивалот. Има изработено маички со различни апликации, беџови и брендирани чаши со логото на фестивалот, кои ќе можат да се купат во посебно катче, виношоп, куќичка лоцирана на плоштадот ’Македонија’“, додаде Темова.