06.10.2012, 15:22 „Век за самување“ најдобра поема за 2012 година
Одлуката едногласно ја донесе жири во состав Бранко Цветкоски, Санде Стојчески и Јовица Тасевски Етернијан
„Век за самување“ под шифра „илуминација“ ја доби наградата „Григор Прличев“ за најдобра поема на македонски литературен јазик за 2012 година.
Одлуката едногласно ја донесе жири во состав Бранко Цветкоски, Санде Стојчески и Јовица Тасевски Етернијан.
Жирито на прес-конференција истакна дека е задоволно од големиот одѕив на 20. Конкурс за наградата што го организираат редакцијата „Детска радост“ и Центарот за култура „Григор Прличев“ од Охрид.
Пристигнале 31 ракопис од кои четири не ги исполниле формалните критериуми и испаднале во првиот круг, а во најтесен избор, покрај наградената поема, биле и: „Азбуката наша света“, „Молк и мир“, „Проклетија“ и „Лудобилје“.
- Поемата „Век за самување“ донесува самосвесен и прочистен пев, кој е во плодоносна комуникација со големите светски поеми што значат висок дострел во европската и светската литература. Овој моќен пев, од почетокот до крајот се одвива супериорно, со очигледна полифонија, со продуктивна алузивност и со семантичка и мошне ефикасна флуентност, својство кое и овозможува да се чита на повеќе рамништа и планови, истакна меѓу другото Бранко Цветкоски, претседател на жирито.
Името на авторот на наградената поема ќе биде познато кога тој ќе и се јави на редакцијата. Наградата која има и паричен дел ќе му биде врачена во февруари во Охрид во рамки на манифестацијата „Прличеви беседи“.
|
