(ФОТО) По „Сити мол“, турканици и на „Бела ноќ“

Скопјани уживаа додека им правеа фигури од 60-тите, видоа кои беа „Голтарите“, слушаа музика од 90-тите години на минатиот век

Катерина Богоева

ФОТО: Киро Попов

Со фризури како од шеесеттите години на минатиот век, фотографирани пред постер на „Битлси“, насмеани и размуабетени, излегуваа дел од посетителите на Музејот на град Скопје синоќа на „Бела ноќ“, каде што и стартуваше осмата по ред манифестација на која секој можеше да си најде по нешто интересно за Скопје, но и за самиот себе и за својот однос кон градот. Посетувајќи ги петте изложби од добро конципираниот проект „Скопје: врвни сеќавања 1960-2010 вол.“ поставени на исто толку различни локации од двете страни на Вардар, постарите посетители си ја обновуваа меморијата, а некои од нив прв пат и гледаа одредени уметнички дела, читаа информации, слушаа музички парчиња кои случајно или не, ги пропуштиле. Генерациите пак, кои од петдеценискиот период од културното живеење на градот во својот живот „фатиле“ помали или поголеми парчиња, љубопитно откриваа што се случувало некогаш во и надвор од институциите. Читаа, и од фотографии гледаа кои биле „Голтарите“ во 70-тите, како изгледале првите неконвенционални изложби и како ги третирала тогашната власт, кои биле одгласите во печатот, што се случувало во 80-тите, 90-тите години на минатиот век, но и во почетокот на овој век во градот, на неговата институционална и вонинституционална културна сцена. Очекувано, оваа топла саботна вечер имаше многу публика и на плоштадот „Македонија“, која застаната и на скалилата на фонтаната го следеше мултимедијалниот перформанс „Местото каде сум“, урбано-визуелната приказна за растењето на Скопје од неолитот до денес, доловена преку возбудливиот театар на сенки и добра музика.

Големиот број на посетители кои шетајќи од една до друга локација во Старата скопска чаршија, во Градскиот парк, во Градскиот трговски центар (а патеката водеше и до Универзална сала), потврди и овој пат дека скопјани не се туркаат само пред „Сити мол“, туку и пред музеи, галерии... Дека знаат да чекаат со часови за да фатат добра позиција пред почеток на концерт (МКЦ). Креаторите на проектот „Скопје: врвни сеќавања 1960-2010 вол.“, Филип Јовановски, Ивана Васева и Јована Попова умееја да почувствуваат што да и' дадат на скопската публика. Го ставија Скопје во фокусо�� на „Бела ноќ“ и преку учеството на околу 200 уметници и различен вид на учесници, повторно му ги открија навидум подзаборавените сегменти.

Мошне умешно овој проект им даде можност на скопјани да си ги откријат личните приказни, фотографии, себеси во градот, но и влијанието на Скопје во своите животи. А уметниците добија можност повторно да си ги презентираат делата што некогаш ги создале, идеите кои ги воделе, и се разбира, со тоа и самите себеси. Публиката кога сето тоа во себе ќе го сублимира (доколку се потруди), може да добие и нова, своја лична дефиниција за Скопје, градот што години наназад, кој се', и на каков ли не начин, катадневно го дефинира и го редефинира.