Путин како „супермен“

Рускиот претседател Владимир Путин вчера го прослави 60.роденден во кругот на семејството во родниот град Санкт Петербург. Неговите симпатизери организираа низа манифестации во негова чест, а опозицијата организираше простести на кој го исмеваше. Без разлика на се`, така или инаку, цела Русија го славеше вчера Путиновиот јубилеј.

Руската телевизија НТВ синоќа емитуваше документарен филм за претседателот на Русија, Владимир Путин, во кој тој е опишан како неуморен и сериозен лидер, кој не прифаќа внатрешни и меѓународни критики.

Филмот „Непознатиот Путин“, исто така, го прикажува спартанскиот режим на рускиот лидер, кој вклучува секојдневни физички активности, умерена исхрана и работа до доцна во ноќта.

Во документарецот Путин одговара на некои деликатни прашања.

- Опозицијата има право да го изрази своето мислење во рамки на законот, изјави рускиот претседател.

За опозициските лидери тој вели дека „ако човек претендира да биде лидер треба да покаже дека е способен за нешто“.

- Не отфрлам никого и не сакам да понижам ничие достоинство од евентуалните опозициски лидери, но освен кревање врева, парадирањето и надворешниот ефект, тие треба прво нешто да направат, да докажат и да покажат дека се способни, а потоа да претендираат да бидат лидери. Се надевам дека по природен пат ќе се отстрани плевелот и ќе се појават навистина силни, интересни и содржајни луѓе, кои се способни да преземат одговорност, истакнува Путин.

Во врска со пресудата на трите девојки од панк групата „Пуси рајт“, Путин вели дека ја поддржува одлуката на Судот.

- Мојата прва реакција беше дека тие треба да се извинат и да побараат прошка и со тоа да заврши, но тие продолжија да креваат врева и на крај стигнаа до суд, кој им пресуди две години затвор, одговори шефот на руската држава.