08.10.2012, 13:12 „Скопско“ и „Кока Кола“ по еколошки стандарди
Пиварница Скопје денеска доби А- интегрирана еколошка дозвола со која гарантира високи еко стандарди во работата
Пиварница Скопје инвестираше 3 милиони евра во пречистителна станица за био третман на отпадните води. Станицата придонесува за управување на екосистемот, но истовремено овозможува и ефективна заштеда на вода и енергија, што е основно барање на современите текови. Компанијата денеска од министерот за животна средина Абдилаќим Адеми доби А- интегрирана еколошка дозвола. Со неа компанијата гарантира дека во сите сегменти од своето работење применува високи стандарди за зачувување на животната средина, почнувајќи од изборот на суровини, контролата на производството до управувањето со амбалажата и пакувањето.
Инвестицијата на Пиварница ја поздрави и вицепремиерот Владимир Пешевски, кој рече дека од една од водечките компании во земјата се очекува да биде лидер и во заштитата на животната средина.
Заштитата на животната средина како што истакна генералниот директор на Пиварница, Јаак Микел, целосно е вградена во долгорочните планови за развој на компанијата.
„Инвестиравме многу во нашите технолошки процеси и во опремата и целосно сме усогласени со строгите стандарди за заштита на животната средина на ’Кока кола’, ’Хајнекен’ и со законските стандарди кои се предвидени со Законот за заштита на животната средина во Македонија“, рече Микел.
Доделувањето на А - Интегрирана еколошка дозвола, министерот Адеми посочи дека е резултат на имплементирањето на оперативниот план на компанијата.
„Пиварница Скопје ја препознаваме како инсталација која континуирано вложува напори и финансиски средства во подобрување на животната средина. Грижата за околината е многу повеќе од исполнување на законските одредби. Тоа треба да биде начин на секојдневно однесување, работење и одговорност на сите нас“, истакна Адеми. (С.Н.)
|
