Пазарот на труд остана без мајстори

Компаниите не можат да најдат квалификувани работници и апелираат за брзи измени во образовниот систем и преквалификации

МаЈа Томиќ


Честите промени во образовниот систем, но и намалениот интерес на младите за учење стручни предмети придонесоа денеска на пазарот речиси да нема заварувачи, бравари, машинобравари, монтери, водоинсталатери, оператори на машини, па дури и машински инженери, лаборанти, технолози... Па, компаниите мака мачат да најдат квалификувани работници. Со овој проблем се соочуваат фирми од разни дејности, а оние од металопреработувачката, прехранбената и електроиндустријата први одговориле на анкетата што ја спроведува Стопанската комора на Македонија. На прашалникот испратен во вкупно 200 фирми од преработувачката индустрија, веќе се стасани одговорите од 20 компании.

При тоа, сите одговориле дека имаат проблеми со наоѓање соодветни работници од одредени занимања. Причини има повеќе. Или затоа што тоа занимање е веќе избришано од образовниот систем, или пак, постои во образованието, но на пазарот не може да се најде кадар, или пак, оние кадри кои се на располагање имаат несоодветно ниво на образование и им недостигаат потребните знаења и вештини.

Затоа бизнис-заедницата упати апел до институциите што побрзо да почнат со решавање на проблемот со недостигот од стручна, квалификувана работна сила, кој посебно ќе се засили во наредните четири до пет години кога ќе заминат во пензија сегашните возрасни работници и нема да има кој да ги замени.

„Институциите, а посебно Министерството за образование и Агенцијата за вработување, треба веднаш да почнат да работат сериозно на овој проблем, затоа што по пензионирањето на сегашните кадри, нема други млади работници кои ќе дојдат на нивните работни места. Недостигот од квалификувана работна сила ќе предизвика сериозни проблеми за редовното одвивање на производството и за нивото на продуктивноста на трудот“, рече на вчерашната прес-конференција Стојмирка Тасевска од Стопанската комора. Таа посочи дека е во тек анкетата на Комората, која трае веќе три недели, а во наредните 20 дена се очекуваат информации и од градежништвото, текстилната индустрија, дрвопреработувачката и други дејности. Потоа Комората ќе направи целосен извештај за состојбата на пазарот со квалификуваната работна сила.

Според резултатите од досегашната анкета, на компаниите од металопреработувачката и електроиндустријата им недостигаат заварувачи од сите типови, бравари, машинобравари, монтери, одржувачи на водоинсталации, виљушкари, металостругари... Некои од овие занимања веќе не постојат во образовниот систем, а некои ги има, но не можат да се најдат работници на пазарот. Им недостигаат и машински техничари и лаборанти со средна стручна спрема, а со високо образование машински и градежни инженери, инженери за безбедност, контролори за квалитет, пред се' затоа што овие кадри или ги нема на пазарот на трудот или се со несоодветно ниво на образование. На фирмите од прехранбената индустрија, пак, им недостигаат технолози, маркетинг-менаџери и тим-лидери на продажба, а оние кои можат да се најдат, немаат доволно вештини, знаења или искуство и со тоа не можат да одговорат на потребите на компанијата.