Ненад Секирарски го отвора 6. Моден викенд Скопје 2012



Тројца креатори ќе ги претстават своите колекции пролет/лето 2013, со што полека се фаќа светскиот тренд за една сезона понапред со претставување на колекциите

ФОТО: Киро Попов

Колекцијата пролет-лето 2013 на Ненад Секирарски ја доживеа својата промоција на Модната недела во Париз и стигна назад во Македонија, точно навреме за да го отвори шестото издание на Модниот викенд Скопје 2012. В недела, на 14 октомври, со шоурумот на креаторот Ненад Секирарски во хотелот „Арка“, започнува првиот дел од шестата сезона на овој моден настан, кој ќе трае од 14 до 18 октомври.

Првпат Модниот викенд Скопје, кој веќе се етаблира како своевиден репер за модното живеење во Македонија, ќе го испроба концептот на манифестација во два дела. Вториот дел ќе се одржува од 24 до 28 октомври 2012 година.

Деновите од 14 до 18 октомври ќе бидат резервирани за бизнис-програмата, чиј фокус ќе биде претставувањето иновативни техники и инструменти за промоција на модните брендови во Македонија и во странство. На 16 октомври ќе се случува проектот „Мода преку филм“, поддржан од амбасадата на Германија во Скопје, а инициран од Моден викенд Скопје и Фиер менаџмент, двете компании што го реализираат Фестивалот на модни филмови во Берлин.

На 17 октомври, во „Соравија центар“ во Скопје ќе биде организиран бизнис-форум на темата „Моден бизнис, маркетинг и купување - развивање и стратегија“. За време на бизнис-презентациите ќе бидат изложени модните остварувања на студентите од Европскиот универзитет.

Вториот дел од 6. Моден викенд Скопје го „отвора“ модната новинарка Снежана Јаначковска-Богдановска, која на 24 октомври ќе има своја презентација на тема „Бизнис-стил“. На 25 октомври, Никола Ефтимов и Александра Јовановска ќе ја презентираат својата нова колекција, а во деновите до 28 октомври ќе се случуваат модните претставувања на колекциите на другите македонски креатори во салонот на „Ауди - Порше Македонија“. (Ј.П.)