Светски ден на Бонд, Џејмс Бонд

Петти октомври 2012 година е прогласен за Светски ден на Џејмс Бонд и низ светот ќе се одбележи 50-годишнината на оваа позната франшиза

Се' започна со „Д-р Но“ пред точно 50 години, со буџет од само милион долари. Денес тоа е најдолгата франшиза во историјата на филмот, кој има и свој ден - 5 октомври, Светски ден на Џејмс Бонд.

Петок, 5 октомври 2012 година е прогласен за Светски ден на Џејмс Бонд и низ светот ќе се одбележи 50-годишнината на оваа позната франшиза.

Бонд мина голем пат во изминатите 50 години од првото прикажување на буџетски скромниот филм „Доктор Но“ на 5 октомври 1962 година.

Главниот лик беше убиствениот таен агент, кој носи костуми „Савил Роу“, вози „астон мартин“, го сака своето мартини протресено, а не промешано и се претставува како „Бонд, Џејмс Бонд“.

Канаѓаните Хери Салцман и Американецот Алберт Броколи, двајца млади продуценти, ги купија правата на серијата романи на Ијан Флеминг, поранешен разузнавач од Втората светска војна, кој агентот 007 го осмисли како некој вид свое алтер его.

Салцман и Броколи имале буџет за филм од само милион долари, но со помош на среќата успеале да привлечат неверојатна екипа на таленти.

Филмскиот серијал за агентот 007 е најдолга филмска франшиза во историјата со 23 снимени филмови. Најновата авантура на овој агент се вика „Скајфол“ и ќе се појави на 26 октомври во Велика Британија и на 9 ноември во САД.

Во САД ќе бидат организирани различни случувања по повод одбележувањето на Светскиот ден на Џејмс Бонд вклучувајќи ретроспектива на филмовите во Музејот на модерната уметност во Њујорк и вечер посветена на музиката со филмовите на Бонд во Академијата на филмска уметност и наука во Лос Анџелес, соопшти дистрибутерската куќа „Так“.

Во другите земји низ светот, исто така, се планирани посебни случувања, па така во Велика Британија ќе биде одржана аукција на Џејмс Бонд меморабилии, чиј приход е наменет за УНИЦЕФ и други хуманитарни организации. Радиостаниците низ светот на тој ден ќе пуштаат теми за Бонд.

Во Белгија и Јужна Африка, работниците овој ден ќе го одбележат со облекување фустани и косуми во стилот на Џејмс Бонд во рамките на „Лежерниот петок“.

Документарниот филм „Се' или ништо: нераскажана приказна за 007“ ќе биде прикажан во Австралија, Белгија, Франција, Холандија, Индија, Јапонија, Летонија, Мексико и Русија.

Документарецот е проследен со интервјуа со петмина од шест актери кои го играа Бонд.

Тајниот агент 007 го играа Шон Конери, Роџер Мур, Џорџ Лезенби, Тимоти Далтон, Пирс Броснан и Даниел Крејг, кој ќе го игра Бонд и во новиот филм „Скајфол“.

Во новиот филм, Крејг се враќа како легендарниот британски таен агент 007. Лојалноста на Бонд кон шефицата „М“ ќе биде под големо искушение кога нејзиното минато ќе се врати да ја прогонува.

МИ6 ќе биде нападнат и 007 мора да ги уништи заканите независно од цената и личната жртва.

Филмот го снимија компаниите „ЕОН“, „Сони“ и „МГМ“. Режисер е Сем Мендес, продуценти Мајкл Г. Вилсон и Барбара Броколи, а сценариото го потпишаа Нил Первис, Роберт Вејд и Џон Логан.