05.10.2012, 16:16 Меморандум за двојна употреба
Некоректен, наменет за меѓународна публика и со цел да и купи време на Грција - вака неофицијално од официјални кругови се оценува меморандумот на грчкиот шеф на дипломатијата, Димитрис Аврамопулос, испратен на адреса на министерот за надворешни работи Никола Попоски. Јавно ,пак, сите велат дека треба да се поздрави во пакет со наши забелешки, за да не биде Македонија таа која ќе испадне неконструктивна во барањето решение за спорот околу името. Прв неформално денеска се огласи тој на кој му беше упатен меморандумот, министерот Попоски, кој во својот дипломатски дневник ја поздрави иницијативата на Аврамопулос и му порача дека е добро Македонија и Грција да се разберат, но услов за тоа е да се испочитуваат досега преземените обврски, очигледно мислејќи на обврската од Времената спогодба да не ја блокира Македонија кога бара прием под БЈРМ или да го шири опсегот на прашања за преговори.
„Не радува што доаѓа одговор на писмо и иницијативи со кои настапивме. Тоа е за поздравување“, пишува Попоски оценувајќи го меморандумот како „можност да се надминат недоразбирањата“. Потоа тој изнесува пет става околу документот што се практично одговор на неговата содржина. Во нив министерот вели дека добрите соседи работат на намалување на чувството на загрозеност, дека взаемно ги почитуваат суверенитетот и територијалниот интегритет и го поттикнуваат прекуграничното поврзување. Тие, порачува натаму Попоски, носат одлуки кои ги почитуваат демократските принципи и владеењето на правото дома и надвор и „апсолутно ги почитуваат сите претходно превземени обврски“. Последната порака- одговор е дека добри соседи водат сметка и за градење доверба и почитување на чувствата и правата на своите граѓани и на соседот. Со оглед на тоа дека вчера Владата имаше поважна ситуација од меморандумот, т.е. требаше да ја преживее интерпелацијата, интернет одговорот на шефот на дипломатијата беше порака дека грчката иницијатива е примена со сериозност во Македонија, генерално не се одбива, но одговорот ќе почека. (С.Ј.)
|
