04.10.2012, 13:23 Светска банка бара 600 милиони нови работни места до 2020
Меѓународното стопанство би морало да креира 600 милиони нови работни места до 2020 година за да ги прифати младите луѓе кои се приклучуваат кон светската работна сила, но и за да го поттикне развојот, да ја подобри положбата на жените и да ги спречи немирите, соопшти Светска банка.
Во својот најнов извештај за светскиот развој банката нагласи дека отварањето на работните места треба да биде приоритет за сите влади, имајќи предвид дека пред помалку од две години недостигот од можности за вработување бил една од причините за немирите, кои кулминираа со соборување на лидерите во Египет и Тунис. Ефектите од таквите настани се видливи и надвор од економската сфера, а креирањето работни места е камен-темелник на едно општество, се вели во извештајот.
„Демографските промени, напредокот на технологијата и долготрајните ефекти на меѓународната финансиска криза ја преобликуваа областа на вработување во сите земји ширум светот“, изјави претседателот на СБ, Џим Јонг Ким. Според него, земјите кои успешно се приспособија на овие промени и кои се изборија на полето на вработувањето, можат да остварат значителен раст на животниот стандард и продуктивност, како и поголема социјална кохезија.
СБ нагласи дека многу држави, со оглед на тоа што минале низ најлошата економска криза од Втората светска војна, сега треба да ги достигнат преткризните нивоа, во време кога е забележано забавување на глобалната економија. Владите треба да препознаат кои работи најмногу им одговараат на нивните потреби и на приватниот сектор да му дадат мотивација за инвестирање. Задача на владите е и да обезбедат макроекономска стабилност и поволни услови за работа. (Ек.Р.)
|
