04.10.2012, 16:17 СДСМ ќе се појави на координација кај Вељаноски
Од кабинетот на Вељаноски најавија дека е можно седницата за интерпелација на Владата воопшто да не почне, доколку опозицијата ја бојкотира и оваа координација
Парламентарната опозиција предводена од СДСМ утре ќе испрати свој претставник на координацијата кај претседателот Трајко Вељаноски, на која треба да се договорат деталите околу текот на седницата за доверба на Владата. Ова е одговорот на СДСМ по најавите од кабинетот на Вељаноски дека можно е седницата за доверба на Владата, иако е закажана воопшто да не почне, доколку опозицијата одлучи покрај редовните да ја бојкотира и оваа координација.
„Принципиелниот став на опозицијата за неучество на понеделничките координации останува. Но, нема да дозволиме со евтини трикови од техничко - деловнички карактер да се опструира расправата за доверба на Владата, која е уставно загарантиран механизам“, изјави пратеникот Јани Макрадули.
Оваа одлука СДСМ ја донесе откако Вељаноски ја одби нивната идеја писмено да се договорат за редоследот на говорниците на денешната седница, како што прават пред секоја седница за пратенички прашања.
Тој го вратил списокот на говорниците, што го достави СДСМ, со образложение дека и распоредот и редоследот на седница на која се гласа за доверба на влада се утврдуваат на посебна координација според Деловникот.
Според списокот на СДСМ, прашањето зошто треба да се гласа за недоверба на Груевски прва треба да го образложи Радмила Шекеринска, а потоа следуваат пратениците Гордан Георгиев, Наташа Савова и Игор Ивановски. Последен на списокот на кој има 32 говорници, е Стојко Пауновски кој всушност треба да се обрати пред премиерот Никола Груевски. (Т.П.)
|
