04.10.2012, 13:00 Владина делегација повторно замина во Индија
Македонска владина делегација повторно замина во Индија, односно во Бангалор, кој е најголем ИТ центар во светот, за да ги претстави можностите за инвестирање во Македонија.
Делегацијата е составена од министрите за информатичко општество Иво Ивановски и за странски инвестиции Бил Павлески, директорот на Дирекцијата за технолошки индустриски развојни зони, Виктор Мизо и економскиот промотор во Индија Тони Атанасовски. Тие завчера одржаа презентација на поволностите за инвестирање, во Тривандрум, Индија.
Министерството за информатичко општество и администрација соопшти дека најголем интерес комп��ниите пројавиле за секторите ИТ и ИТ паркови, здравство, едукација, минерални суровини и туризам. На форумот присуствувале над 70 компании од различни сектори, а почесен гостин на настанот бил сопственикот на реномираната компанија ИБС, лидер во развојот на софтвери во авионската индустрија.
Тривандрум се наоѓа во индиската држава Кирала, која има 33 милиони жители и важи за еден од трите најуспешни ИТ центри во Индија со реномирани ИТ паркови и присуство на најголемите ИТ компании од листата на Фортуне 500. (Ек.Р.)
|
