Атина дојде до Грците со сметки во Швајцарија

Списокот со имињата на две илјади Грци кои имаат депозити во вкупна вредност од 1,5 милијарди евра во филијала на ХСБЦ (HSBC) банката во Женева, синоќа му бил предаден на обвинителот за финансиски криминал Григорис Папонис.

Лидерот на ПАСОК Евангелос Венизелос, кој е поранешен министер за финансии, изјави дека го имал списокот на мемориски диск и му го предал на премиерот Андонис Самарас кој потоа го доставил во Одделот за финансиски криминал (СДОЕ).

Мистеријата околу дискот се создаде откако Јоргос Папаконстантину, кој пред Венизелос беше министер за финансии, откри дека во 2010 година добил диск од нег��вата колешка во тоа време Кристин Лагард, кој потоа му го предал на СДОЕ, додавајќи дека оттогаш дискот го нема.

Венизелос прво рече дека претпоставил оти информациите ги имаат властите, но потоа го предаде меморискиот диск кога беше соопштено дека СДОЕ ги нема тие податоци. Лидерот на ПАСОК исто така изрази сомнеж дека податоците можат да се употребат за правна акција против затајувачите на данок затоа што не се добиени легално.

Грчките медиуми јавуваат дека повеќето од сметките на списокот веќе не се активни и многу им припаѓаат на грчки бизнисмени во странство, но и оти на листата се наоѓа името на поранешен политичар од Нова демократија.

Во меѓувреме, синоќа е уапсен поранешниот шеф на обвинителството во Министерството за одбрана Јанис Сбокос. Тој е меѓу неколкумината обвинети за корупција заедно со поранешниот министер за одбрана Акис Цохаѕопулос.