Академик Ристовски - Прашањето за идентитетот не е новина

„Матица ексклузив“ ги промовираше првите пет тома од планираните десет од капиталниот опус на академик Блаже Ристовски

Тина Иванова

Монографските изданија посветени на стожерниците на македонската национална свест, Крсте Петков Мисирков, Димитрија Чуповски, на Македонското научно- литературно другарство во Петроград, на Кочо Рацин и Никола Јонков Вапцаров, како и „Историјата на македонската нација“ од академик Блаже Ристовски вчера ја доживеаја својата промоција во новоотворениот простор на издавачката куќа „Матица“ - „Матица ексклузив“. Станува збор за промоција на првите пет тома, од планираните десет, кои во наредните години ќе го заокружат обемниот и капитален научноистражувачки опус на академик Ристовски.

Директорот на „Матица“, Раде Силјан, кој ги промовираше изданијата, рече дека академик Ристовски континуирано, со многу љубов, трпеливост и посветеност веќе шест децении ги проучува појавата, развитокот и афирмацијата на македонската национална мисла. „Како верен и доследен следбеник на Мисирковите идеи, познатиот научник се придржува на фактите и во својата научноистражувачка работа секогаш поаѓа од нивната изворност, автентичност и неодрекување. Тој темелно ги истражи и научно ги согледа централните пројави во нашата историја: словенската писменост и христијанизацијата, државните формации во Македонија во средновековието, почетоците и развитокот на преродбенскиот процес и борбата за обнова на Охридската архиепископија. Голем е влогот на академик Ристовски во афирмирањето на Македонското научно-литературно другарство во Петербург, кое е основа на новата епоха во македонската културно-национална мисла и акција“, истакна Силјан.

Академик Ристовски е автор на 70 одделни публикации, со над 20 илјади страници.

„Се работи за избор од моето научно дело, кој треба да опфати десет тома. Предизвик за мене беше токму изборот, односно што да вклучам во овие десет тома од сето она што сум го работел. Бидејќи досега имам објавено многу книги и да се собере сето творештво во десет тома е многу битно“, рече академик Ристовски на вчерашната промоција. „Прво се определив за монографската обработка на личности. Овие пет првопромовирани тома се оние каријатиди од нашата културна и национална историја, од половината на 19 век, па до ослободувањето. Се надевам дека интерес ќе предизвикаат и оние томови што се занимаваат со македонскиот фолклор кои подоцна ќе бидат објавени. Мислам дека тоа ќе биде посебен придонес во осознавањето на идентитетот на македонскиот народ“.

Тој додаде и оти големо внимание им посветил и на процесите во развитокот на македонската литературна реч. „Јазикот и литературата се основата и на нашата современост“. И се запраша: „Како денес да се сфати борбата за идентитетот?“ Рече дека македонската книжевна историја, борбата за македонската државност, ќе бидат застапени во посебни томови. „И прашањето за идентитетот не е новина. Тоа е залеано со многу крв, а таа вековна борба е регистрирана во делата на нашите дејци“, истакна академик Ристовски, кој додаде дека десетте тома ќе бидат заокружување на неговата научна дејност, но и наследство кое, рече, се надева дека ќе придонесе во самоосознавањето на Македонците во иднина. „Нашата национална свест во голема мерка е корка. Треба да придонесеме кон осознавањето на македонскиот народ. Нашата наука се' уште стои пред многу предизвици“, истакна Ристовски