03.10.2012, 15:47 „Гугл“ пред „Мајкрософт“, „Кока кола“ на врвот
На врвот на листата на „Интербренд“ 12 години едноподруго е „Кока кола“, но интересно е што „Гугл“ го надмина „Мајкрософт“. Од ИТ компаниите и натаму прв е „Епл“
Листата што ја објави консултантската куќа „Интербренд“ покажува дека „Кока кола“ и после 12 години не се симнува од врвот, како највреден бренд во светот. Првото место оваа компанија го држи уште од 2000 година. Вредноста на компанијата се проценува на вкупно 77.839 милијарди долари.
На „Кока Кола“ опасно и се приближува „Епл“, благодарение на големата популарност на телефоните и на таблетите произведени од компанијата. Оваа компанија е на второ место на листата на „Интербренд“, како резултат на убедливо најголемиот раст на вредноста на брендот, за дури 129 отсто, достигнувајќи 76,568 милиони долари. Аналитичарите проценуваат дека со ова темпо на раст следната година „Епл“ може да ја надмине вредноста на брендот на „Кока-Кола“ и да стане највреден светски бренд, покрај тоа што неодамна стана највредната светска комапнија. На трето место со раст на вредноста на брендот од 8 отсто, односно 75,532 милиони долари, се наоѓа брендот на технолошката компанија ИБМ, а на четвртото место со раст на вредноста од 26 отсто се наоѓа светски познатиот пребарувач „Гугл“. Овој бренд според истражувањето сега вреди 69,726 милиони долари.
Меѓу првите десет на листата на „Интербренд“ единствен пад на вредноста на брендот забележува „Мајкрософт“, чија вредност опадна за 2 отсто, на 57,853 милиони долари.
За прв пат оваа година „Гугл“ го надмина „Мајкрософт“. Доброто претставување на „Гугл“ може да се објасни со одржливите позиции на компанијата и во другите сегменти од пазарот, интернет пребарувањето , онлајн-рекламирањето, мобилните реклами и мобилните оперативни системи. Меѓу првите десет највредни брендови на светот се наоѓаат и „Џенерал електрик“, „Мекдоналдс“, „Интел“ и „Тојота“. Најдобро позициониран неамерикански бренд е јужнокорејската компанија „Самсунг“, која се најде на деветтото место.
Европските брендови не се најдоа меѓу првите 10 на ранг листата на „Интербренд“. Од европските марки највисоко котира „Мерцедес-Бенц“ на 11. позиција и БМВ на 12 место.
Најдобро позициониран нов бренд е „Памперс“, на 34 место, а нови на листата се и „Прада“ и „Мастер кард“. Пад на вредноста минатата година, претрпеа една четвртина од брендовите на листата од 100 највредни. (С.М.)
|
