Претседателот Иванов во посета на Босна и Херцеговина

Република Македонија и Босна и Херцеговина денеска ќе ја потпишат Спогодбата за соработка во областа на здравството и медицинските науки

Претседателот на Република Македонија Ѓорге Иванов, денеска и утре престојува во официјална посета на Босна и Херцеговина.

Во рамки на посетата, претседателот Иванов во Сараево ќе оствари средба со претседавачот со Претседателството на Босна и Херцеговина, Бакир Изетбеговиќ, со членовите на колегиумот на двата дома на Парламентот и со претседавачот со Советот на министри на Босна и Херцеговина, Нермин Никшиќ.

Република Македонија и Босна и Херцеговина денеска ќе ја потпишат Спогодбата за соработка во областа на здравството и медицинските науки. Досега се потпишани околу 20 билатерални договори, што, како што се оценува, не соодветствува со степенот на развиенот на политичките односи меѓу двете држави.

Претседателот Иванов ќе ја посети базата ЕУФОР во Бутмир, каде ќе положи венец на спомен обележјето на загинатите припадници на АРМ и ќе оствари средба со медицинскиот тим „Алтеа” од Република Македонија.

Европското движење на Босна и Херцеговина на македонскиот претседател вечерва ќе му додели Орден за придонесот во регионалното европско партнерство, развојот на пријателствата, процесот на помирување и подобро разбирање меѓу народите во овој дел од Европа.

Утре, претседателот Иванов во Бања Лука ќе оствари средба со претседателот на Република Српска, Милорад Додик, со претседателот на Народното собрание на Република Српска и со Здружението на иселеници од Република Македонија во Бања Лука.