Интервју - Не повикав на војна со Грција

„Кривично треба да одговараат оние што ме обвинија со клевета и ставија во политичка пресметка еден трагичен настан“, вели Тодор Петров, претседател на Светскиот македонски конгрес

Горан Адамовски


Дали имавте контакт со родителите на момчето за кое тврдите дека е убиено и што велат тие?

- Јас го осудив убиството на студентот Александар Самарџиев откако бев известен дека на 29 септември починал, бидејќи претходно сите медиуми во Македонија ја информираа јавноста дека е претепан на 28 септември во Солун и пренесен во болница со тешки телесни повреди, со последици по животот. Неговите родители не ги познавам.



Каде и кога е погребан Самарџиев?

- Известен сум дека е закопан на 30 септември во 14 часот. Другото нека го одработат Агенцијата за разузнување и Дирекцијата за државна безбедност и контраразузнавање.



Дали имате потврда за убиството на момчето од друг извор, освен од Стилјан Самарџиев? Можно ли е цело село, сите здруженија на Македонци, сите државни институции на двете земји да се синхронизирани до тој степен да не излезе никаде потврда за случајот?

- Верувам дека Александар Самарџиев не е фантом, туку претепан од членови на неонацистичката „Златна Зора“, кој на 29 септември им подлегнал на повредите и починал. Доказите се сокриени заради заштита на државни интереси на Грција. Впрочем, „Златна Зора“ е креација на грчката тајна полиција против имигрантите и Македонците во Грција. Не очекувам медицински извештај од болницата „Папаниколау“ во Солун, или писмени белешки од грчкото МВР или МНР, тие не се надлежни мене да ме информираат. Јас незнам некое село да се оградило, чув само за реакцијата на „Виножито“ дека не сакаат да го коментираат настанот. Конспирацијата нека не ве изненадува, та што ако е во прашање држава, напротив уште повеќе, оти таа е организирана власт со свои интереси и извршители.

Со Вашите изјави кои се протолкуваа како повик за војна со Грција, навлековте реакции од партии и поединци кои бараат истрага од Обвинителството? Стравувате ли од ваков епилог?

- А, каде и кога Тодор Петров упатил повик за војна со Грција? За болни шпекуланти од фабриката на СДСМ и ситни политиканти си има други јавни установи, не можам јас да им лечам фрустрации. Кривично треба да одговараат тие што мене ме обвинија со клевета што самите си ја конструираа и еден трагичен настан го ставија во политичка пресметка со опонентите. Јавниот обвинител не е бабарога за да се плашам од него, но тој прво нека ја реши пријавата против Љупчо Георгиевски, спинот на СДСМ и Софија, кој правеше заговор за поделба на Македонија со премиерот на Србија.



Дали е коинциденција што сето ова се случуваше пред посетата на еврокомесарот Филе на Атина, каде што разговараше и за проблемот со името?

- Прашањето е неосновано, такво сценарио вртат само болни умови против Македонија. А, мислите дека еден Стилјан Самарџиев го одврати Филе во Атина од решение за името на државата Македонија? Да не е смешно ќе биде комично. Патем, и во оваа прилика потврдувам дека државното име Македонија никогаш нема да се смени. Државата била и ќе остане само Македонија. А кој мисли дека може да го смени, и од манипулации против Тодор Петров може да гради стратегија за елиминација на оние кои се против промена на државното име Македонија, само нека проба!