Без СДСМ на координација, нема седница за доверба

Вељаноски вчера преку телефонски пораки ги известил координаторите на сите пратенички групи дека утре пред почетокот на седницата ќе се одржи координација

Татјана Поповска

Доколку координаторот на пратениците на СДСМ Игор Ивановски не се појави на координација кај претседателот на Собранието Трајко Вељаноски, на која ќе се договорат деталите за текот на петочната седница за доверба на Владата, можно е седницата воопшто да не почне. Ваква можност најавуваат од кабинетот на Вељаноски, имајќи го предвид неколкумесечниот бојкот на СДСМ на координациите. Потсетуваат дека во Деловникот јасно е наведено дека пред ваква седница се одржува координација на која се договара редоследот на говорниците и соодносот меѓу власта и опозицијата. Вељаноски вчера преку телефонски пораки ги известил координаторите на сите пратенички групи дека утре пред почетокот на седницата ќе се одржи координација.

„Станува збор за специфична седница, за која не важат истите правила од седниците за пратенички прашања, каде што соодносот на говорниците е два спрема еден. Затоа е потребно сите да дојдат на координација и да се договориме“, велат од кабинетот на Вељаноски.

Тие се повикуваат на член 216 од Деловникот каде што се вели дека „редоследот на пратениците по пратенички групи и пратениците кои не се организирани во пратеничка група, а кои ќе учествуваат во претресот се определува во договор на претседателот на Собранието со координаторите на пратеничките групи пред почетокот на седницата“.

Во пратеничката група на СДСМ вчера не сакаа да ја коментираат ваквата најава од Вељаноски, ниту пак дадоа јасен одговор дали ќе одат на координација или не. Веројатно конечна одлука ќе донесат на денешната средба што пратеничката група ќе ја има со претседателот на СДСМ Бранко Црвенковски.

„Деловникот ќе се почитува и договор ќе се постигне, што е обврска за сите“, порачаа кратко од СДСМ, не прецизирајќи дали ќе направат исклучок и само за оваа седница ќе го прекинат бојкотот.

Во партијата на Црвенковски потенцираат дека ним Уставот им ја гарантира можноста да побараат седница за доверба на Владата и дека таа мора да се одржи. Во уставните одредби каде што се регулира прашањето за доверба на Владата никаде не стои обврска пред седницата да има координација кај претседателот на Собранието.

Пратеничките групи од опозицискиот фронт предводени од СДСМ од април оваа година ги бојкотираат собраниските координации кои се одржуваат секој понеделник кај собранискиот спикер. Причината за ваквиот потег е тоа што Вељаноски одби на дневен ред на собраниска седница да постави законски решенија предложени од СДСМ.