Епилог од интерпелацијата. Политиката е б��ак од интерес

Ниту владините партнери, ниту пак политиколозите немаат идеја како би можеле да се решат проблемите што ја предизвикаа кризата меѓу ВМРО-ДПМНЕ и ДУИ

Татjана Поповска

Оптоварени со сериозни несогласувања и намалена меѓусебна доверба, владините партнери ВМРО-ДПМНЕ и ДУИ треба да ја продолжат коалициската соработка, по довербата што им ја дадоа пратениците во петокот доцна вечерта. Како ќе функционираат понатаму, имаат ли капацитет да ги решат проблемите и да ги залечат раните што меѓусебно си ги нанесоа или и во двете партии знаат дека ова е само преоден период што мораат да го издржат, пред да распишат предвремени избори, се прашањата што во јавноста се наметнаа, откако стана јасно дека Владата на Никола Груевски нема да падне. Владејачкото мнозинство во петокот, со 68 гласа „за“ и 42 „против“, ја отфрли иницијативата за недоверба на Владата што ја поднесе СДСМ.

Ниту владините партнери, ниту пак експертите или политиколозите немаат идеја како би можеле да се решат проблемите што ја предизвикаа владината криза од 13 август - денот на одбележувањето на Рамковниот договор, кога делегација на АРМ се поклони пред борците на ОНА во Слупчане, па се' до денес. Никој не знае што ќе се случува со законот за бранители. Во ВМРО-ДПМНЕ тврдат дека тој ќе се донесе, во ДУИ дека нема, ако не бидат опфатени и борците на ОНА. А во меѓувреме Талат Џафери продолжува да молчи на седниците на Комисијата за труд и социјалната политика. Исто како што никој не знае како ќе се реши проблемот со новите имиња на чаирските училишта.

Во партијата на Никола Груевски, ВМРО-ДПМНЕ, велат дека и пред и по гласањето за доверба на Владата, институциите функционираат со полн капацитет.

„Важно е да се реализираат проектите и да нема застои во работата. Останува за проблемите да се обидеме да најдеме заедничко решение“, велат во ВМРО-ДПМНЕ.

Иако и во ДУИ официјално тврдат дека институциите на Владата функционираат, не кријат дека „ги погодило“ обраќањето на премиерот Груевски, со кое им прати јасна порака дека се неприфатливи нивните барања и однесувања, кои ги оцени како провокации. Сепак во партијата на Ахмите овие пораки ги толкуваат како лични ставови на Груевски, а не како позиции на Владата.

„Говорот на премиерот е негово лично мислење, а не владина политика. Владата мора да функционира во координација меѓу двата политички партнери, инаку ќе ни' се случуваат блокади“, велат од ДУИ.

Експертите се сомневаат дека Владата може уште долго вака да функционира. Велат дека или ВМРО-ДПМНЕ и ДУИ ќе седнат и ќе се договорат или ќе мора да се одржат предвремени избори. Политикологот Здравко Савески смета дека владините партнери и покрај тоа што се расправаат, тесно се поврзани за така лесно да ја растурат владината коалиција. Тоа, смета тој, го покажа и петочната седница на која Владата преживеа, а позициите на двете владејачки партии останаа забетонирани.

„Очекувам ВМРО-ДПМНЕ и ДУИ да продолжат да функционираат на истиот начин како и досега. ВМРО-ДПМНЕ да ги промовира своите аргументи, ДУИ своите, а коалицијата да не биде доведена во прашање. На овој начин и двете партии си ја дигаат популарноста пред локалните избори, а и за евентуални предвремени избори. Крај на целата оваа игра може да се стави само ако работите излезат од контрола, што може да биде и многу опасно“, вели Савески.

Доволен сигнал дека на кабинетот на Груевски наредниот период нема да му биде лесно, според политиколозите, е и поделеноста што министрите ја манифестираа на петочната седница. Не само што министрите од ВМРО-ДПМНЕ и од ДУИ влегоа одвоено, едните со Груевски, а другите со Ахмети, туку и во текот на целата седница беше забележлива слаба, речиси никаква комуникација меѓу членовите на двата табора. Оттаму, логично е таквата поделеност и оддалеченост да се манифестира и во работата на владините институции.