Мое ќоше

Тура во иднината

Ерол Ризаов

Изберете на која екскурзија во иднината ќе заминете - во Жабени или во Карпош

Не ми излегува од глава досетливоста на битолскиот градоначалник Владимир Талевски кој прв во Македонија се сети да организира бесплатно екскурзии во иднината. И гледај чудо, иднината на битолчани им била сосема близу на еден чекор до нив, на една полјана во селото Жабени. Се качувате на автобус и додека да трепнете со очи, стасувате во вашата иднина. Тоа што не му успеа на највидовитиот од овие краишта, оџата од Битола - Десоецот, му тргна од рака на еден световен градоначалник. На една селска утрина кај Жабени се градат две фабрики на познати компании. Во нив неколку стотици битолчани ќе заработуваат за живот. Таму е нивната светла иднина, излезот од сиромаштија.

Ја прифаќам оваа убава идеја на битолскиот градоначалник и еве предлагам и неговите колеги да организираат бесплатни тури во иднината. А каде би била првата станица. Мислам дека моментно нема посоодветно место за футуристички излет од новиот „Сити мол“, изграден во Скопје. Веднаш да ви кажам, бев таму на отворањето и ги видов новите првоборци како пак први стасаа во иднината. Додека се редеа говорниците на бината, ги имаше пет- шестмина само од врвот на актуелната политика, тргнав спокојно да ги разгледувам содржините на новиот центар. Се уморив од одење низ тоа прекрасно мермерно здание, помалку разочаран што не е ниту во барок ниту во рококо-стил, туку со нормална прагматична архитектура што ги одликува сите такви убави центри со извонредни содржини каде што можете да поминете еден убав ден неделно или месечно во зависност од џебот во друштво со вашите најблиски. Ќе ви ја оддадам тајната за блескавиот старт на новиот трговски центар, или како што го крстија „Сити мол“. Некако ми е туѓо името, ќе мора да му дадеме скопски прекар. Прво, самиот комплекс над земја и под земја урбанистички и архитектонски гледано е еден прекрасен објект кој идеално се вклопува во амбиентот на еден од најурбаните скопски квартови - Карпош. Второ, внатрешните содржини се мамката која не' влечеше да одиме во Солун, Белград, Милано, Париз, Лондон. Големите брендови стасаа во Скопје, крпчињата, чевлите, храната, забавата, со нивниот печат, конечно, се тука, за истите пари можеме да си ги дозволиме и овде кај нас, заштедувајќи скапи патувања, хотели кои секогаш повеќе чинат отколку она што сме го купиле во елитните светски продавници. Осветлувањето и аранжирањето на продавниците и излозите, широките холови и високите тавани, имињата на звучните брендови ве прават да се чувствувате поубаво без оглед дали сте по модата или не. Ако уште можете да си дозволите да ручате во еден од прекрасните ресторани или да се напиете добро кафе во кафулињата, па да појдете во едно од трите кина каде што стасаа и новите филмски технологии 3-Д, каде што со чудесните наочари имате чувство дека и вие сте внатре во филмот, тогаш ја имате доживеано вистинската екскурзија во иднината.

И сега, на крајот, еве ја мојата јанsa која ја имаат и инвеститорите кои вложија во овој проект над 100 милиони евра. По две години, во првите денови од стартот на новиот „Сити мол“, инвеститорите почнале да спијат понормално. Ја пребродиле тешката несоница, иако и сега одвреме-навреме имаат ноќни кошмари. Уште ги измачува дали добро го пресметале ризикот што не зависи од нивната работа и од нив. А тоа е иднината на Македонија. Ми кажаа од прва рака дека не се одлучија да фрлаат големи пари за да ги уништуваат другите трговски центри или да форсираат профити со нелојална конкуренција. Напротив, нивната мисија е на истиот пат со Македонија. А, тоа е европеизација на Македонија и на регионот преку потрошувачкото општество и преку еден нов вид потрошувачка култура која опфаќа повисоки стандарди и квалитет не само во облекувањето, храната, масовната култура, книгата, играчките за деца, туку, воопшто, во стилот на живеење. Не станува збор само за помодарство и за трендовски потрошувачки и скороевски менталитет. Туку се работи, велат, за првите доходовни и задолжителни инсталации на европскиот пат на Македонија. Овие луѓе од трговијата, заедно со хотелиерите стасуваат први. Тие го чувствуваат мирисот на парите оддалеку. По нив доаѓаат банкарите и градежниците, па потоа стасуваат сите други, топтан, заедно со тешкашите. Кога големите брендови и светски мастадонти доаѓаат, иднината станува поизвесна и повидлива. Први доаѓаат, ама бидете внимателни и први и си одат. Тие секогаш се само кираџии. Ако тие ја збришат, останува само мостот, ама и тој без реката народ преку него не е веќе тоа за што е изграден. Вие изберете на која екскурзија во иднината ќе заминете. Во Жабени или во Карпош. Па раскажете ни што видовте.