Опозицијата на паралелен парламент дискутираше за власта
Експресното носење на законите, Деловникот, спектакуларните апсења и, како што рекоа, играњето со опозицијата како со пластелин, беа главните поенти од трибината „Демократија, демократура, диктатура“, што ја организира опозицијата непосредно пред одржување на седницата за избор на Владата. Со ова опозициските партии јавно и' порачаа на власта дека таа не го напуштила парламентот и оти единствено таму треба да има дебата.
„Груевски во кампањата ни кажа - опозицијата може да биде каде било, вклучително и на улица, ама само да не биде во парламентот. Оваа работа ја кажа и единствено не излажа. Секој ден власта, Владата, институциите, полицијата, со секој чекор сакаат да ја избркаат опозицијата надвор. Зошто власта одлучи да ја брка опозицијата од парламентот. Кој е тој страв, кој е тој проблем што треба да се реши со усвојување на Деловникот“, праша Радмила Шекеринска од СДСМ.
Според Стојан Андов, новиот Деловникот ги скратува правата на опозицијата, додека лидерот на ЛДП, Јован Манасиевски, оцени дека ВМРО-ДПМНЕ смислено ја избркала опозицијата од Собранието и побара од премиерот Никола Груевски да го обелодени договорот со лидерот на ДУИ, Али Ахмети.
На трибината учествуваа и претставници од невладиниот сектор кои обвинија дека за оваа Влада дијалог значи кога посилниот зборува, а другите слушаат и исполнуваат, со што се наметнува атмосфера на страв. Организаторите на трибината, како дел од диктаторското однесување го оценија и недозволувањето на претседателот на Собранието, Трајко Велјановски, трибината да ја одржат во една од собраниските сали. Им било речено дека таму требало да се одржи координација на ВМРО-ДПМНЕ, но Шекеринска, која за време на трибината проверуваше, рече дека до крајот оваа сала останала празна и заклучена. (Св.У.) |
