Мнозинството го протурка и Законот за јазиците
Според лидерот на ДПА, Мендух Тачи, Законот е најголемо предавство на интересите на Албанците во Македонија
Светлана Унковска
На речиси идентичен начин како и со Деловникот, во петокот околу 18 часот без никаква најава, ненадејно на дневен ред се најде Законот за употреба на јазиците, коај го усвоија пратениците без да ја знаат неговата содржина. Она што го бараа партиите на Албанците за претседавање со собраниските комисии на албански јазик е усвоено, а покрај ова, унапредување на користењето има и во министерствата, како и во другите државни институции. Владејачките ВМРО-ДПМНЕ и ДУИ го бранат усвојувањето на овој Закон, додека опозициските СДСМ и ДПА го критикуваат не само начинот на донесување, туку и самиот закон.
Најгласен беше лидерот на ДПА, Мендух Тачи, за кого ова претставува најголемо предавство на интересите на Албанците во Македонија. „Ако војводата Али Ахмети сака да разбере што е тоа службена употреба, нека појде во Косово да види како таму е регулирана употребата на српскиот јазик. Вака се сведува како служење со албанскиот јазик на исто ниво како во Јапонија, Кина или Сингапур“, рече Тачи. Според него, нема ништо од ветувањата на Ахмети дека јазикот ќе се употребува во Владата, дека Албанците во судството ќе имаат право да се бранат на мајчин јазик, како и да го употребуваат во полицијата и во војската.
Ваквите обвинувања не сакаше да ги коментира лидерот на ДУИ, Ахмети, кој му забележа на Тачи дека тој додека бил во власта ја пропуштил шансата да го донесе законот. „Се' што е постигнато со Законот за употреба на албанскиот јазик е во духот на Рамковниот договор и има уставна основа“, одговара Ахмети на прашањето зошто се согласил на ваков компромис, иако ДУИ претходно бараше повисока употреба на албанскиот јазик и издигнување на ниво на втор службен јазик. Тој уверува и дека за негово донесување имало единство во партијата и дека сите пратеници гласале за законот.
За начинот на донесувањето на Законот реагираше и Радмила Шекеринска од СДСМ. „Власта ја избрка опозиција за да може во новопоставениот термин, петок попладне, со светлосна брзина да ги донесува најтешките и најважни закони како што се Деловникот и Законот за јазиците“, рече таа, додавајќи дека, сепак, го поздравува изгласувањето на Законот, со забелешка дека Груевски тоа можел да го стори и пред две години.
Некои пратеници на ВМРО-ДПМНЕ признаа дека биле изненадени и воопшто не знаеле дека се подготвува носење на законот. Според усвоениот Закон за употреба на јазиците, кој беше и предмет на дијалог на лидерските средби, јазикот што го зборуваат најмалку 20 проценти од граѓаните, покрај во Собранието, ќе се употребува и во комуникација на граѓаните со министерствата, со народниот правобранител, во судските и во управните постапки, во извршување на санкциите, при изборниот процес и референдум, при издавање лични документи, водење матична евиденција, примена на полициски овластувања и во други области.
Досегашното барање од партиите на Албанците, покрај за дискусии, право за користење да имаат и при водењето на собраниските комисии се исполнува, а истовремено и собраниските материјали ќе бидат двојазични. Ваквата одредба ќе значи и многу поголеми трошоци за државата, бидејќи ќе бидат потребни нови вработувања, а дополнително оптоварување за буџетот ќе биде и проширувањето на употребата на албанскиот јазик и при комуникацијата со министерствата. Ќе се јави потреба и за нови вработувања во полицијата затоа што новина е тоа што при примена на полициски овластувања службеното лице мора да му се обрати на неговиот мајчин јазик. Така, при апсење на криминалците, полицаецот ќе мора на неговиот мајчин јазик да му ги каже причините за приведувањето.
|
