Деца за невести поради сушата

ХАБАСВЕИН – „Тоа се прави во темнина“, вели Фатума Ахмед, чучнувајќи внатре во своето импровизирано засолниште од прачки. „Некои луѓе си ги продаваат ќерките на млада возраст за да добијат храна. Тоа е вообичаено но луѓето молчат за тоа“.

Долгата суша во северниот дел на Кенија принуди многу семејства, како тоа на вдовицата Ахмед и нејзините седум деца, да одат кон предградијата каде што имаат поголеми шанси да добијат храна и вода.

Хуманитарната помош е недоволна и луѓето прибегнуваат кон очајни стратегии. Во Кенија незаконски е да се стапи во брак на возраст помала од 18 години – па за феноменот „невести поради сушата“ само се шепоти. Браковите со деца не е невообичаена појава во овој дел од светот. Многу сточарски заедници, како што се Сомалијците во Хабасвеин, веруваат дека е од големо значење да ги омажат своите девојчиња кога тие се млади за нивната чест или невиност да биде зачувана.

Жените кои нема да се омажат на млади години се смета дека имаат некаква мана и се товар за семејството.

„Во нашата култура девојките се мажат дури на деветгодишна возраст“, вели еден здравствен работник на локалната заедница. „Таа е принудена да се омажи за некого иако не сака. Тие се принудени од нивните родители“. Меѓу сточарските заедници „миразот“, во овој случај цената за невестата традиционално се дава на семејството на невестата во форма на добиток. „Луѓето се венчаваат кога имаат мираз да платат и се' е во големи количини“, вели Абди Исак, локален хуманитарен работник. „Кога тука е зелено, животните може да пијат вода. Тоа може да се види од лицата на луѓето. Нивните лица светат, бидејќи имаат доволно храна во нивните домови“.

Но, повеќето животни пцовисаа поради сушата која погоди околу 10 милиони луѓе во Рогот на Африка. Мршите на животните доминираат на пустинскиот пејзаж. Сега младите девојки се продаваат, според локалните жители, за само 15.000 кениски шилинзи (168 долари). „Ако тој е богат, цената може да достигне и до 50.000 шилинзи (559 долари)“, вели Ахмед.

Гладот ја поттикнува размената. „Мајка ќе ја извади својата 14-годишна ќерка од училиште и ќе ја продаде на маж – дури и на постар маж – за да добие пари за да им обезбеди храна на другите деца“, вели локалниот старешина. „Некои домаќинства имаат и по 10 деца и обезбедувањето храна за тие деца е навистина тешко“.

Запишувањето во неговото локално основно училиште опадна на 210 деца од претходните 350 откако минатата година почна сушата. „Над стотина се преселени поради гладот“, вели тој. Според ОН, само секое петто девојче во североисточната провинција оди на училиште.

Хуманитарната агенција „Светска визија“ не може да најде 400 од 3.060 деца што ги спонзорира во областа. Некои се испратени да живеат со подобро ситуираните роднини кои може да ги прехранат. Некои работат како куќни помошнички или во киосци за храна. Но, други ги мажат „само за да се осигураат дека остатокот од семејството нема да умре од недостиг од храна“, вели Џејкоб Алему, менаџер на локалната програма на „Светска визија“. (ТрастЛо)